أمسى

قصيدة : امسى راس الحسين وي الجسم
الشاعر : الشيخ كاظم منظور الكربلائي
الرادود : الحاج ملا باسم الکربلائي

أمسى رأس الحسين وي الجسم
أمسى والرآس يشجي الحــآله
لن سحقته الخياله
امسى رأس الحسين ويا الجسم
******
عن لسان الحال ابين
خٌبر عن رأس الحسين
من تلاقا ويا الجسم
بالقبر يوم الأربعين
حين شاف الجسم رأسه
انعطف و ابداله الحنين
واظهر الصوت من النحر
يا رأس إبن سيد البشر
عقبك علّي تدري شصدر
لعبت الخيل إعلى صدري
و بالحوافر رضته
بدمي .. غسلني وادي كربلا
بدمي .. متوسد اعلى رماله
لن سحقته الخيــاله
******
بالشمر تخبر بيوم
اللي على صدري إعتلى
وفرزك عني يا رأس
حسين إبن عقد الولا
ورفعك عالرمح وآنا
بقيت مرمي بالفلا
دمي من جروحي يكت
ومن دم وريدي تغسلت
بذار الوطيه تچفنت
الرأس نادى النوب أخبرك
حالي واجرت دمعته
راسك .. يا جسم تدري بالـ قطع
راسك عالرمح لمن شاله
لن سحقته الخيــاله
******
اهنا يجسمي ان چان
ذار الريح سوالك جفن
راسك بديرة الكوفه
ببطن تنور انسجن
تشهد بهاي الحواري
النزلت ويا ام الحسن
بهودج النور من السمـآ
يا جسم وامي فاطمه
منها المدامع ساجمه
ومـآتم بدار الخوله
على مصابي نصبته
مصابي .. وامي الزهره تحن على
مصابي .. وعيونها همـآله
لن سحقته الخيــاله
******
الجسم نادى هنا يا رأسي
من الضما جبدي انفطر
سهم المثلث بقلبي
مضى و مطلاعه الظهر
ما بقى مفصل صحيح
وعظم سالم ما انكسر
وتعلم الجمال شصنع
بالخاتم اغتر و طمع
وبخنجره الچفي قطع
حتى ثوب اللي عليه
آل اميه سلبته
ضامي .. يا راس منهو الـ منچتل
ضامي .. و مثلي انفطر دلاله
و لن سحقته الخيــاله