دوس الورد (مكتوبة) - باسم الكربلائي
منذ ١٠ سنوات٦٧٤مشاهده
قصيدة : دوس الورد و انت اتشوف
الشاعر : ناظم الحاشي
الرادود : الحاج ملا باسم الكربلائی
دوس الورد و انت اتشوف...عطر الورد ما ينداس
عطرك يظل بيك ايطوف...يالما شفت حنه و ياس
ليلة حنتك...ذبلت وردتك
عطر الورد ما ينداس
******
من عطر وردك عطر جنة خلودك
ما خفو عطرك تره الداسو ورودك
انت ربك بيك يتباهه بسجودك
بيده راسم عالعرش لوحة وجودك
من داستك خيل إعداك...بيك العطر ظل فوّاح
و الهالزمن ظل وياك...باقي العطر لا ما راح
ذبحوا فرحتك...ليلة حنتك
عطر الورد ما ينداس
******
عين ما شافت فرح ليلة فرحها
روح طارت قبل لا يكبر جنحها
الشمس غابت بالفجر ويه صبحها
غيره بأيام المحن غزّر ملحها
نور النبوه المنطيك...هاي الصفه امن الكرار
و الغيره من صعدت بيك...قتلك يبن الأبرار
صعدت غيرتك...ذبلت وردتك
عطر الورد ما ينداس
******
النساء القصن اجفوف النبيهن
من جماله و فقدن بيوسف وعيهن
لو وكتهن طالع القاسم عليهن
جان قصن روسهن مو بس ايديهن
هذا الجمال المكنون...ما ينوجد بين الناس
ما شفنه منهن بالكون...وجهك ووجه العباس
حاضر زفتك...ذبلت وردتك
عطر الورد ما ينداس
******
صوره من نور الحسن بالطف لقوها
بالسيوف أملاك ربك صوروها
عالبقيع بغير حايط علّقوها
و بالطفوف أهل المكارم ودعوها
صوره انت لك وسط العين...صورها داعي الإيمان
صوت الوحي ادموع حسين...أيدها نور القرآن
نزلت آيتك...ذبلت وردتك
عطر الورد ما ينداس
******
آني لو هسه بقلب زينب أشوفك
مستحيل أفراقك و أعوفك
اشلون قدرت عمتك تحمل ظروفك
يا جرح مو بالسهل عاشق يروفك
يالغالي جرحك ما طاب...باقي ابضمير الوالاك
بالقلب نشتم عطاب...من سبب نار العاداك
ناحت عمتك...ذبلت وردتك
عطر الورد ما ينداس
******
أمك التاريخ واجب من يمرها
ينزل الرجلينها و يذكر صبرها
آني ما شايف مره اتقدم ذخرها
للمنيه و ينذبح زهرة عمرها
من زفتك لرض الموت...ثوب الحسن ويه حسين
مهضومه و تنادي بصوت...للغالي وفّت الدين
أمك نادتك...ذبلت وردتك
عطر الورد ما ينداس
******
كل شباب انشوفه نتذكر عذابك
اهواي عدنه اورود ذبلت وي شبابك
لا حملناها و لا نحمل غيابك
بالمصاب امصابهم يشبه مصابك
دم الشباب المغدور...من طفك اليوم إنعاد
دمك و دمهم مهدور...من الأجداد و أحفاد
غدروا شيعتك...ذبلت وردتك
عطر الورد ما ينداس
التعلیقات