ليلة وفاتي (مكتوبة) - باسم الكربلائي

قصیدة : ياليلة وفاتي
الشاعر : السيد عبد الخالق المحنة

الرادود : الحاج ملا باسم الكربلائی 

 

يا ليلة وفاتي يوم الطف مماتي
دعواي ابصلاتي أخلص من حياتي
لا ظليت وتمنيت أخلص من حياتي
******
طبع هالدنيا اول معرفتها
تباغتني اوتجي بالماردتها
لون عِدها مشاعر عاتبتها
شأكول اوضحكة الـ شامت شفتها
كل الـ ماهويته يادنيه لگيته
والطالت أذيته يرتاح ابمنيته
لـ الله دعيت وتمنيت
أخلص من حياتي
******
اخد كل شي الوگت مني اورماني
اشبقى عندي بعد والمن اتاني
نفوني اومن هلي محد لفاني
غريبة اوبالدمع يغرڪ مكاني
چم غالي اويه غالي راح وهذا حالي
شتريد الليالي ما واحد بگالي
مو مليت واتمنيت
أخلص من حياتي
******
منيتي إتأخرت ياناس مرتين
انا المفروض اموتن وي الحسين
لْـۆ يم النهر من شفت چفين
وابن جوشن يناديني اخوتج وين
دورت المنيه برض الغاضريه
بت حامي الحميه گادوني سبيه
ابحرگ البيت واتمنيت
أخلص من حياتي
******
من شال الشمر ايده عليه
ردت موتي لجن ماصح بديه
ضربني اوطاحت اعليه رقيه
رفسنه اثنينه او سب الزچيه
ليل الوحشه شفته مرعوبه اوسهرته
والمدمع سألته وين العايف اخته
اشكد ناديت واتمنيت
أخلص من حياتي
******
الف نومه ابلحد بيها رضينه
ولا لحظة ابيسر مرت علينه
يسيل الدم يشيعة من ادينه
ننام اشلون وينظرون لينه
عيني اشلون تغفه يم الما اعرفه
ياهالناس وسفه عالمگطوع چفه
من ناديت واتمنيت
أخلص من حياتي
******
يتامه ازغار عندي اومايحملون
يلوذون ابعباتي من يخافون
يعمه ليش يازينب يسئلون
تتأذين من انجيس المتون
سوط الماله ذمه طرمتني ياعمه
وعليكم اضمه من ايسيل دمه
وتأذيت واتمنيت
أخلص من حياتي
******
خبر اولادي ابد ما حجيته
شدهني مصرع اخواني اونسيته
شفتهم عالثره اوشوفي عميته
عِفتهم نومه وابن امي اعتنيته
ياابن الاذكره .. وابن امي انظره
يمه الخيل كثره وتدوس اعله صدره
اركض جيت واتمنيت
أخلص من حياتي
******
رحت لمحمد اوطالت وگفتي
اخوي وظل يناشد منهو انتي
صحت زينب انا اوسالت دمعتي
صفگ بيده اويگلي انتي اختي
اي محمد اختك م̷ـــِْن يسري اوگصدتك
يوم الطف ذكرتك من سلبوني ردتك
يالماجيت واتمنيت
أخلص من حياتي