أنت ثاري (مكتوبة) - باسم الكربلائي

قصيدة : أنــت ثــــأري .. و ثـــأر الله يـــا إمــــامـــي

للشاعر : الاديب الحاج جابر الكاظمي

الرادود : الحاج ملا باسم الکربلائی

 

إذا عـندك شخص مثل أبو الأكبر .. بـَذل من أجلك و من أجلي منحر
دلـيـنـا أرد أعـشـﮓ بيه و أفخر .. و أصيرن عنك و عنه محامي

و حـﮓ ربي الرفع هاي السماوات .. مثل سبط الرسول تشوف هيهات
مـحـبته تصفي كل البشر و الذات .. صفى بريحانة الهادي اعتصامي

أنــت ثــــأري .. و ثـــأر الله يـــا إمــــامـــي

إرفعت صوتي و صحت يا علة الكون .. يظل ﮔـلبي إلك يَحسين مرهون
ضـمـيـري إنـتـه و الـمهجة و العيون .. و إنته مبدأي و إنته ختامي

أنا عبدك صرت و الملك أنتا .. غرامك شرف و بأعماقي صنته
بكريات الدم اليجري مزجته .. يا من جسمك هوى على الغبرة دامي

أنــت ثــــأري .. و ثـــأر الله يـــا إمــــامـــي

تعيش بكل وكت كل لحظة وياك .. و اذكرك من تصول عليا دنياي
إذا أعطش و اهم أرد اشرف الماي .. اصيح أشرب أشلون و انتا ضامي

تعيش وياي و آنا عايش وياك .. أحبك حب زرع للماي و اهواك
غريب و من بعيد القلب ناداك .. إلك يحسين أبث خالص سلامي

أنــت ثــــأري .. و ثـــأر الله يـــا إمــــامـــي

سليل الهادي مني و منك يريد .. نجدد بيعته بكلمة التوحيد
القلب و يا القلب و الأيد الأيد .. احامي عنك و عني تحامي

بطريق الوحدة يتحقق آملنا .. نوافي اللي بذل دمه لأجلنا
نفيس العمر من اجله بذلنا .. يظل بيت الوحي عالي و سامي

أنــت ثــــأري .. و ثـــأر الله يـــا إمــــامـــي