الدنيا ما ترحم (مكتوبة) - باسم الكربلائي

القصيدة : الدنيا ماترحم
الشاعر : علي السقاي
الرادود : الحاج ملا باسم الكربلائي

روح الله ويَّاك ييُمه الدنيا ما ترحم
بِالدنيه شِتريد إذا أولها تتيتَم
ماكو غير الجروح اسمع جلمتِي وروح
******
يَامَحسِنْ ثَالِث الْحَسنِينْ أَسمَكْ
يَابَضْعَة فَاطمه وأُمَكْ تِكَلمَكْ
إّذا عًمري تِريدَه الْعُمرَ أَسَلمَكْ
لّجِنْ يَاوليدِي مَاراح أَبْقَى يَمَّكْ
مِثَلْ هَالدنيا لاتْصَدَقْ ترحمَكْ
لَونْ بِيها رَحَم جا رحمت أُمَكْ
بِالدنيا أولاد يظلمونا وظيفتهم
شما جرا مصاب أساسه من سقيفتهم
مِنهُم قَلبِي مَجروح.. اسمع جلمتي وروح
******
إِلَكْ خَلْ أَحجِي يَآ آخِر بِنينِي
شتريد بدنيا مارحمت حنيني
بعدني بزُغري وبزَهوة سنِينِي
الضِلَعْ مِتْكَسِر ولَطمَه على عِينِي
صَحَتْ مِن سَقَطوك بكِلْ وَنِينِي
يَقَعْ قَلبِي ولايوقَعْ جِنينِي
مِنْ فَكرت بِيكْ قِلَتْ اسبقنِي للجنَّه
بِالدنيا لاتعيش يتيم وتِكبَر الونّه
قَبلِي سَلَّم الروح.. اِسمَع جِلمتِي وروح
******
يَاوردَه انْقِطْعَتْ بِين الرياحِينْ
قَبلْ مِيلادَك اِتْعنَّى لك البِينْ
جَدَلْ خَل نِفترضْ لَو عايش سنِينْ
الدنيا تراقبك ماتغمض العِين
مصِيرك بيها بَس واحِد مِن اثنِين
لَو مِثلَ الحَسَن لو مِثلَ الحسِينْ
لَو عِمرك يطول يَيُمه ومامِتت بِالسَم
وي نَحر الحسِين وريدَكْ لاتِظَنْ يَسلَمْ
توقع يُمه مذبوح.. اِسمَع جِلمتِي وروح
******
بِالطف لوتِعيش تأَدِي بِيعَه
رخِيصَ الدَّم لَابو اليَّمه تبيعَه
قَبل مَاجِثَتَكْ توقَع صريعَه
بدورَك تِكفَلَ الحُرَّة الوَدِيعَه
لَأجِلْهَا تْغَرِّق الطَف بِالشَريعَه
تَالِي توقَعْ جفوفَك قطيعَه
خَل يَاخِذ الدور أَخوك اِلـ مابَعَد شِفتَه
الـ يَّتْسَمَى عَبَّاس وَهوالـ يَّتْكَفِلْ بأختَه
بعينه ثارك يلوح اِسمَع جِلمتِي وروح
******
أَريد بْموتَتَكْ يَم عتبَة الدار
أَواسِي حسين حينَ بطفله يَحتَار
أشوف لكربلا بعيونك آثار
مِثَل عَبدالله بس النبله بِسمار
بِجيت على المِصاب مابعد صار
مِثل بابِي وخيم قلبِي اشْتَعَلْ نَار
ابجِي على طفلين ولايبرد جَمر قَلبِي
مِن هايَ الأحزان أَنوح وأَشْتِكِي لربِي
أدعِي ودمعِي مَسفوح.. اِسمَع جِلمتِي وروح
******
كًلْ شِي عمره يَخلَص حَتى لَو طَآل
فَقط وَجهالله باقِي بْحُكم الآجَآل
مِن اقَلَّك روح موبَس جِلمَه تِنْقَالْ
أنَا أدرِي الموت أرحَم بكِلَّ الأحوال
إلَّا يكون تِحمَلْ سبِي العيَال
تِنْظَر وَقْفَة أختَكْ بينَ ألرجَالْ
أرحَم لك تموت ولَا تِنظر وَضِعْ زِينَبْ
سبِي ودَواوين شِماتَه وحُرَّة تِتغَرَّبْ
زِينَبْ تِبجِي وتنوح.. اِسمَع جِلمتِي وروح
******
بْسَكوتَكْ يَابنِي صِرتَ أَسمَعْ جَوابَكْ
أَودْعَكْ وَالمَهَدْ أَصبَح تُرَابَكْ
عَلى الْعَتْبَه كْتَبِتْ قِصَّة عَذابَكْ
شَهِيدَ بروحتَكْ وَالجِنَّه بَابَكْ
يَامحسِن لاتِظَنْ هِيَّنْ مصابِك
أعيش أيامي مِتْلَهفَه بغيابَكْ
بِسْ باقِي أيَّام نِعَذبها بمدامعنا
يَيُّمَه والموت عقب فرقتنا يجمعنا
موعد يكتبه اللوح.. اِسمَع جِلمتِي وروح