بدموعي اكتبها (مكتوبة) - باسم الكربلائي
قصيدة : لو دهري يحجبها
الشاعر : السيد عبد الخالق المحنه
الرادود : الحاج ملا باسم الكربلائي
لو دهري يحجبها...بدموعي أكتبها
و أقراها بعيون الشمس...زينب زينب
******
بالظلمه أرسمها جنت و أمسح رسمها
خايف عليها امن الضوه يقره إسمها
حته الأرض تاخذ حذر لو مر قدمها
هذي شرف رب الحمه من يدنه يمها
غض البصر و ابعد...احذر عليها اتصد
أم الشرف باجر و أمس...زينب زينب
******
أقسم لون مو كربله محد نظرها
ستر الله و الباري حفظ ستره بسترها
بس الله و أصحاب العبه عرفوا قدرها
ربك قبل حوه خلق هيبة خدرها
بحجابه حجبّها...بآدابه أدّبها
بهودج ملايك تنحرس...زينب زينب
******
شاء الله يوقع عالنهر جف الكفلها
لنها غريبه ابلا حمه بغياب أهلها
سبحانه من خله الشمر يتقرب إلها
سبحانه من خله علي ما يفزع إلها
ما تنعرض يا رب...بس الوضع يصعب
مو سهله يشتمها الرجس...زينب زينب
******
قالوا أسيره اعله الهزل لا مو أسيره
زينب أميره و للأبد تبقه أميره
سيف و عله ارقاب الزلم طول المسيره
اختك يبو فاضل تظل غيره اعله غيره
راية علي عدها...من يوصل الحدها
يالتقرب اعليها احترس...زينب زينب
******
ما تنحني مثل الجبل رغم الرزيه
ثورة مدامع و ابتدت بالغاضريه
ما صدقوا زينب تجي الديوان أميه
واحد سأل واحد صدق زينب سبيه
يتعجب اليسمع...أم الخدر تطلع
ليش ابخرابه تنحبس...زينب زينب
******
ما تركع النجمه أبد لجفوف التراب
زينب أبد ما تهضم قدام الأجناب
جلمتها سيفك يا علي و امتدت ارقاب
زينب إذا قامت زعل ايقوم الحساب
محسوبه جلمتها...و الأقوه سكتتها
الكل الطغاة انطت درس...زينب زينب
******
لا مو عبايه و ما أشك و أحجي بدرايه
هذا جنح جبريل إجه ابهيئة عبايه
أعمه الشمر من يعتقد هاي النهايه
و اللهِ لا تمحو الذكر صارت بدايه
موقفها عباسي...بيها ارفعت راسي
و الزهره أغله من النفس...زينب زينب
******
لو نامت الوادم تجي يم راس أخوها
و اتقله يبن أمي تره اختك سبوها
يا خويه سامحني إذا سكنه ولوها
اشحال التحشم يا هلي بسما إجوها
ظليت أحاميها...تمشي و أباريها
و اللي يمس سكنه يمس...زينب زينب
التعلیقات