صارت غريبة (مكتوبة) - باسم الكربلائي
قصیدة : صارت غریبه
الشاعر : السيد عبد الخالق المحنة
الرادود : الحاج ملا باسم الكربلائي
ها يدنيا هم بعد ظلت عجيبة
هاذي بت حامي الحمه و صارت غريبة
تحرسها الأجناب — لا مو بالحساب
هاذي بت حامي الحمه و صارت غريبة
******
من عمت عينچ يدنيه شگد زغيرة
الأميرة الآمرة صارت أسيرة
امخدرة حيدر علي الـ ماكو نظيره
صارت بولية نذل ما عنده غيرة
بالصحاري حرمة الباري و سراجه
والشمر حادي اويمشيها ابمزاجه
بت قالع الباب — لا مو بالحساب
هاذي بت حامي الحمه و صارت غريبة
******
ينضرب أروع مَثل چان ابخدرها
لو مشت خلف الولي حيدر ذخرها
والحسن و حسين و الثالث گمرها
چف أبو فاضل يظل يمسح أثرها
ما يخلي كل أثر يبگه لجدمها
والهواء ما يگدر ايحرك هدمها
هاي أم الحجاب — لا مو بالحساب
******
مدللة حيدر ولا واحد وصلها
ظلها چان محجب و محجوب ظلها
هسة يا وسفة السمر يتباوع لها
تنهضم و تباوع لراس الكفلها
باليسر طول الدرب تتهامس الناس
عجبة زينب باليسر يتركها عباس
علمونا الأسباب — لا مو بالحساب
هاذي بت حامي الحمه و صارت غريبة
******
شابت و درب السبي يكسر ظلعها
والتراب على الوجه غير وضعها
چم نهر أحمر رسم مجرى دمعها
والصعوبة من توّن شامت سمعها
هذا يشتمها و هذاك يصد عليها
هي من سوط النظر تشگف بيديها
سوط النظر صاب — لا مو بالحساب
هاذي بت حامي الحمه و صارت غريبة
******
مزگوا قرآن بأرض الغاضريه
و انرفع راسه برماح الجاهليه
زينب حجاب العرش راحت سبيه
إنقلاب على الرسالة الأحمديه
زينب الـ وكلها الله بـ هالمهمه
لو يزيد الـ ينتصر لو تمحي اسمه
ويصير الجواب — لا مو بالحساب
هاذي بت حامي الحمه و صارت غريبة
******
ما حسب هذه يزيد بن الدعيه
ثورة أيتام بقيادة زينبيه
ترجف الفرسان من دمعة رقيه
زينب بكل خطوة چانت حيدريه
بكف عقيلة هاشم الراية العظيمة
والعروش انهارت بدمعة يتيمة
ناتج هالمصاب — لا مو بالحساب
هاذي بت حامي الحمه و صارت غريبة
******
من تشوف أم الخدر رغم الرزايا
تلگه بوفاضل بصفها و بيده راية
تلگه ذوالفقار ويزينب حماية
خيم جناح الوحي فوگ السبايا
وبسهولة يا شمر تلفظ اسمها
ما دريت بحيدرة و كافلها يمها
من بعد الأحباب — لا مو بالحساب
هاذي بت حامي الحمه و صارت غريبة
******
روح أبوفاضل بقت تتبع ضعنها
ينسى گطع چفوفه من ينظر متنها
دعوته يا رب بحق فاطم و ابنها
أختي زينب سالمة ردها لوطنها
يا إلهي بعهدتي آني جبتها
للعلي هاي الأمانة تكفلتها
فدوة لها الرگاب — لا مو بالحساب
هاذي بت حامي الحمه و صارت غريبة
التعلیقات