فارس ومعروف (مكتوبة) - باسم الكربلائي
قصيدة : فارس و معروف
للشاعر : علي الخفاجي
الرادود : الحاج ملا باسم الكربلائی
فارس و معروف...حيدر امربيني
ما أعرف الخوف...حيدر امربيني
******
آنا مسلم بافتخاري من وصلت الكوفة...وارث الكرار عمي ابرايته المعروفة
حسين مولاي و أميري للأبد ما عوفه...ما يهد الراية مسلم لو تطيح اجفوفه
و الزمان ايشوف...حيدر امربيني
******
لو زعل بالحرب سيفي ما تثني ايميني...الموت فوق الروس ينزل و الفخر يكفيني
هاشمي و طبع المراجل عهد بينه و بيني...أقلب الكوفه و زلمها حيدر اموصيني
ما أهاب اسيوف...حيدر امربيني
******
آنا مبعوث الحسين و آنا راعي الغيرة...يسري حب حيدر ابدمي ما أبدله ابغيره
هذا صوت الشرف صاح و بالعقل تأثيره...مسلم آنا و ما يهمني ما عرف تفسيره
أحجي بالمعروف...حيدر امربيني
******
ما أجوز امن المحبة حته لو ذبحوني...آنا ديني و اعتقادي بالحسين اجنوني
هذا طبعي و ما أعوفه خلهم ايلوموني...ثائر و دمي يسولف عن حبيب اعيوني
عاشق و ملهوف...حيدر امربيني
******
لا بد آيات الكرامة بالقصر أقراها...صرخة حسين الشريفة راح أموت اوياها
حته لو قطعوا وريدي و الله ما أنساها...اشما تمر الدنيه يبقه للخلق معناها
و الفخر موصوف...حيدر امربيني
******
حيدر الكرار عمي آنا درعه و طاسه...زود من حسين آنا عزم من عباسه
جعفر الطيار عمي غيرة ينضح راسه...فِنكم اتلاقون مسلم و الحرب نوماسه
تنكتب بحروف...حيدر امربيني
التعلیقات