ودعتني (مكتوبة) - باسم الكربلائي
قصيدة : ودعتني ابلا خبر
الشاعر : ناظم الحاشي
الرادود : الحاج ملا بلاسم الكربلائی
ودعتني ابلا خبر...لو حجر ذاب الحجر
من غبت غاب القمر...يا علي...يا علي
*****
الجمر ياكل بالجمر دمعاتي تجري...بنار توديعك تبخر ماي صبري
بحالي ليلة وحشتك بس الله يدري...من بعد عمرك عسن لا طال عمري
من شفت نورك رحل...فرغ بيتي امن الأهل
ما قلت ناوي السفر...يا علي يا علي
*****
جنت كل رمضان بوية إقبال عيني...أبد ما أفطر لمن شخصك يجيني
تدري مو للماي يا لهفة حنيني...أفطر بوجهك جنت من تعتنيني
شوفتك تروي الضمه...و حق دمعة فاطمه
قلبي بجفاك انكسر...يا علي...يا علي
*****
كل أذان المغرب أسمع صوت أذانك...هسه تجري ادموعي جيه فارغ مكانك
راحت أيام القبل حلوة بزمانك...و لو بالعباس أشم ريحة حنانك
بيه حنانك من تحن...يون ويايه من أون
لو صحت يحني الظهر...يا علي...يا علي
*****
بوية أذكرك من تخلي إيدك عليه...و تمسح بظهري التضربه اسياط أمية
اشلون لو شايفني بعيونك سبية...كون شايف يا علي إقبالك رقية
و الله قلبك ينشلع...لو شفت نار الدمع
من تموت اعله النحر...يا علي...يا علي
*****
تدري حال البت يبوية ابغير أبوها...اتطيح خيمتها و غريبة ايوصفوها
يا هي مثلي إقبالها يذبحون أخوها...و آنا اخت ساقي العطاشه ايعّطشوها
عطّشوني ابلا ذنب...منعوا الماي العذب
و الكفيل اعله النهر...يا علي...يا علي
*****
من أودعك شرد أقولن لليتامه...من ينشدوني مته اتعود بسلامه
بوية كون اتقوم هالليلة القيامة...و لا أشوفن يبجي محرابك أمامه
بعدك اليا عين أصد...من أصيح و ما ترد
و الله يقتلني القهر...يا علي...يا علي
*****
كلها تبجي الحالي من اتشوف حالي...غالي راح و ينذبح كل لحظة غالي
يمته أبوية اتصيح يا زينب تعالي...موتي أرحم تدري من جور الليالي
بيك جنت امدلـله...هسه أسيرة كربله
ما رحم بيَّ الدهر...يا علي...يا علي
التعلیقات