ناذر سنيني (مكتوبة) - باسم الكربلائي

قصيدة : ناذر سنيني و حياتي الخدمتك

للشاعر : الأديب عبد اللطيف خالدي

الرادود : الحاج ملا باسم الكربلائي

 

ناذر سنيني و حياتي الخدمتك...يا من إلهك رزقني محبتك
ناذر سنيني...ناذر سنيني
******
أرد أعرف نفسي خل تسمع الوادم...حسين أبويه و بيتي يا ناس المآتم
عمري مو أعوام عمري اشكثر لاطم...اسمي مو باسم أنا سموني خادم
آنا انتمائي وولائي الطفوفك...ميت دليلي و يعيش بحروفك
ناذر سنيني...ناذر سنيني
******
حسين إجيتك و الحزن شلته اعله ظهري...الدنيه صحره و آنا أحدي بنوق عمري
كلشي ما عندي و صفه للقبر ذخري...اقرايتك و اللطم يحسين اعله صدري
بس انت عندي و خلافك متاهه...ابيا دنيه أحيه و أشمن هواهه
ناذر سنيني...ناذر سنيني
******
ضايع و ما عندي غيرك ألتجيله...اتعودت من زغري بس بابك أجيله
ببالي بيت ايترجم أحزاني الثقيلة...احنه غير حسين ما عدنه وسيله
شعري و شعوري الحملته بدليلي...ما يشفي و الله و يبرد غليلي
ناذر سنيني...ناذر سنيني
******
التبجي عينه المقتلك معناها ربه...طهّر احساسه و زرع حبك بقلبه
من يجيلك كون نيته ايزور كعبه...بسبعة أشواط الدمع لازم يحسبه
مجلس عزاءك يطهر كياني...المنبر أشوفه كركن اليماني
ناذر سنيني...ناذر سنيني
******
تختلف عن كلشي و الله ليالي عاشور...اعيوني بيها تبجي لكن دمعي من نور
ترف هالدنيه أعوفه لأني منذور...للبواجي و النعي و اللطم لصدور
شهرك أحسه تملك حواسي...يعني قليله طبرتي اعله راسي
ناذر سنيني...ناذر سنيني
******
حسين ريت بمقتلك دوم أبجي من دم...ريت أهشم صدري للصدر التهشم
أرد أعيش بلوعه و بحسرات وبهم...الدنيه لو ما هالعزه تشبه جهنم
ما تسوه دنيه و أعيشن فرحها...حزنك رسم لي ملامح جرحها
ناذر سنيني...ناذر سنيني
******
ارفع ايدك الله بس يسمع دعاءك...يا حسين بجاه نحرك و بدماءك
لو متت باجر تباركني برداءك...تمسح اعليه و دفنتي بكربلاءك
قبري بجوارك ضماني أريده...و القبره يمك تثبّت رصيده
ناذر سنيني...ناذر سنيني
******
عايش و عندي أمل يبن الزجيه...أمك بهذا العمل ترضه عليّه
من يحاسبني غداً رب البريه...اتقله خادم ابني خل أمره بديّه
حبك شفاعه و أريده علامه...بالمحشر أمشي بوسام الخدامه
ناذر سنيني...ناذر سنيني