حزنت السماء (مكتوبة) - باسم الكربلائي

قصيدة : حِزنَت السماء
للشاعر : ناظم الحاشي
شهادة الرسول ص ٢٨ صفر ١٤٣٩
حزنت السماء
والحداد بمملكة عرش الجلالة
نصبت العزاء
فاطمه و عم الحزن بيت الرسالة
وانت تشهد يا محمد
◾️◾️◾️◾️◾️
ملك موتك روحك احتار من إجاها
خاف تاخذ روحه لو روحك خذاها
صاح لك و دموعه تجري بمستحاها
وصل حدها ويومها ربك دعاها
ربك ينتظر عالكوثر تمر
من عنده الأمر أمره واحد
قدم إعتذار
قال لك لو بيدي روحك ما خذتها
صاحب القرار
ما خذاها و انت بيدك سلمتها
هذا مُسند يامحمد
◾️◾️◾️◾️◾️
ناح عزرائيل بدموعه و بچالك
من طلب منه علي يموت بدالك
والحسن يم رجلك اليمنى وشمالك
يصيح يا جداه محتاج لدلالك
وحسين إندعى قبلك مصرعه
شلون تودعه و انت والد
إترك الرسول
قال له حيدر يا ملك موت النبوة
خاطر البتول
إخذ عمري و خل يعيش بعمره هُوّه
موتي أسعد يا محمد
◾️◾️◾️◾️◾️
كل مراسيم الدفن حيدر كفلها
بالدموع جنازتك لمن غسلها
صلى بيها و صاح جبريل و حملها
نزل وياها الگبر و تمدد إلها
ينهض ما قدر عن سيد البشر
مكسور الظهر هذا شاهد
يشهد الجليل
فاطمه الزهراء انكسر بعدك ظهرها
هذا مستحيل
چذب كل من قال لك حلّت شعرها
لبست أسود يا محمد
◾️◾️◾️◾️◾️
رجع داره و قال لاطفاله الحزينة
بعد هذا اليوم جدكم ما يجينا
ولا يدق الباب بيده و يعتنينا
والعذاب الما يصير يصير بينا
والدين الأبي من بعد النبي
بيد الناصبي يبچي قائد
ينقض العهود
والخليفة يصير بيها المو خليفة
والظلم يزود
ما تطيع الناس للعترة الشريفة
عنها ترتد يا محمد
◾️◾️◾️◾️◾️
بنت محمد بعده ما ناشف دمعها
راح يحرق بابها و يكسر ضلعها
الزهراء خلف الباب قالوله و سمعها
وإن قال و راح للباب و دفعها
هذا اللي جرى خذلوا حيدرة
ضد فاطم ترا عن مقاصد
لا يُوَرَّثُون
أنبياء الله و فدك مو للزچیة
يحكم بجنون
سبب چان بموت أعظم هاشمية
بلاية مرقد يا محمد
◾️◾️◾️◾️◾️
ضد علي الأحقاد تعرف ما نسوها
بعد موتك يا محمد طلعوها
خانوا بعهدك وصيتك خالفوها
ثارِ الأصنام الكَسرهن رَجعوها
و اتباع الصنم ندري بلا ندم
تنكث بالقسم هذا وارد
خطبة الوداع
بعد موتك يا محمد ودعوها
كشفوا القناع
و آل بيتك بإسم دينك حاربوها
هدم مرقد يا محمد
◾️◾️◾️◾️◾️
كل صفاتك شافوا بحيدر صفاته
لهالسبب رادوا يذبحونه بصلاته
هَم يدرون بحياتك كل حياته
رادوا يشوفونك تموت بمماته
و بسم الحسن شعلوها الفتن
إشهد يا زمن ذكره خالد
تشهد الرماح
من عقر رمحه الجمل و بهالقضية
بلسم الجراح
طابت بسيفه الجراح الحيدرية
مثله ينعد يا محمد
◾️◾️◾️◾️◾️
ناس كل هاي المجازر ما كفتها
راحت لعترة محمد ذبحتها
بالطفوف بغير ماي و عطشتها
بيك بغضاً كل حريمك من سبتها
يا دم النحر عالسيف انتصر
لليوم الأثر لليجاهد
تبقى كربلاء
ترفض الذلة ولا تقبل عليها
كعبة الولاء
غيرة تنطيك و كرامة من تجيها
بيها تخلد يا محمد