يراحة بالي (مكتوبة) - باسم الكربلائي

قصيدة : يراحة بالي

للشاعر : أحمد الذهبي

طور : حلم_لو_يقظه

 ليلة ١ جمادى الثاني ١٤٣٩ | الكاظمية

 ياراحة بالي ... مكانج خالي

جمر بأنفاسي و احساسي كسروا ضلعها

يماي الكوثر ... صرت مو حيدر

يدور براسي و احساسي كسروا ضلعها

⁦▪️⁩⁦▪️⁩⁦▪️⁩⁦▪️⁩⁦▪️⁩

حبيبة روحي .. و ضماد جروحي

عليها شصاير من خوفي وجعني قلبي

ردت اوصلها .. و عليها اسالها

تهد و اجدامي تتعثر و شطوله دربي

وصلت البيتي .. شفت عافيتي

شمس مجروحه و تناطر و اعليه تربي

بجن ويايه .. حجاب و ايه

و قلت عالظالم و الطاغي اشهد يربي

اذا مر بيها

الهوه يأذيها

شيصير بحالي و احساسي كسروا ضلعها

ترافت وردة

عطر ما بعده

شنو اليجرالي و احساسي كسروا ضلعها

⁦▪️⁩⁦▪️⁩⁦▪️⁩⁦▪️⁩⁦▪️⁩

بقت تشكيلي .. و اعاتب ليلي

و ﻻ جن يسمع تعبني وما جاني صبحه

رهيبة الحاله .. الحبيبه قباله

يشوفه يعاني و ما يقدر يداوي جرحه

اثر يم بابي ... لأعز احبابي

دمع و معاتب و اثار الايادي وكحه

وحق دمعتها .. جرح عصرتها

الوعد خلاني الاذاها ما روح اذبحه

وحق العالي

وصية الغالي

شلتها بعيني و احساسي كسروا ضلعها

نطيت احجايه

حفظت الغايه

وفيت الديني و احساسي كسروا ضلعها

⁦▪️⁩⁦▪️⁩⁦▪️⁩⁦▪️⁩⁦▪️⁩

يجرحي الثاني .. خفيت احزاني

كتمت اهمومي و فاضحني دمعي اعله رمشي

دمع بجناحي .. بعيده افراحي

العمر من دونج يا روحي جابولي نعشي

حمل ساعاتي ..  بثقل آهاتي

زماني الواقف لعيونج ما يرضه يمشي

شنو الباقيلي .. يشمعة ليلي

يعمري الرايح و الآتي چنتي لي كلشي

عجيبيه احلامي

هذيج أيامي

يصيرن ماضي و احساسي كسروا ضلعها

دعيت الباري

يبرد ناري

الحكم و القاضي و احساسي كسروا ضلعها

⁦▪️⁩⁦▪️⁩⁦▪️⁩⁦▪️⁩⁦▪️⁩

اميرة روحي .. ضماد جروحي

اعز ما عندي و دﻻلي و عليها خايف

ملاك سنيني .. و اعز من عيني

حجيها الدافي يتعثر بين الشفايف

بدت تبجيلي .. بدمع تحجيلي

عذاب الفرقه و العشره دلالي عايف

كلت يأحبابي .. حسبت احسابي

اضم جروحي بعيوني ما جني شايف

دمع يتجاره

جهنم ناره

بدت تكسرني و احساسي كسروا ضلعها

صحت يا زاير

دمعنه الباجر

نهاية عمري و احساسي كسروا ضلعها

⁦▪️⁩⁦▪️⁩⁦▪️⁩⁦▪️⁩⁦▪️⁩

اغسل بيها .. و اخاف اجويها

دموع الطاحت من عيني تحرق جهنم

لزمت الكسرة .. شبجت العشرة

جبل لو شايف هالحالة يمكن تهشم

اليغسل بيده .. فرح توعيده

تضيع اماله و سنينه و عمره ايتهدم

ردت بجفوني .. اجفن عيوني

الفها بروحي و بصدري جرحها يلتم

وطن جانت لي

جرح عافت لي

طفت حنيتي و احساسي كسروا ضلعها

شريكة همي

و احسها بدمي

نبض عافيتي و احساسي كسروا ضلعها

⁦▪️⁩⁦▪️⁩⁦▪️⁩⁦▪️⁩⁦▪️⁩

شمس و انباقت .. و روحي اشتاقت

و احس نبضاتي بشرياني عني غريبة

التسد العازه .. شلتها جنازة

دفنت بإيدي غالتي دنيه عجيبه

المشاهد تجرح .. الزمن ما يسمح

اسوي ابصدري و بضلوعي قبر الحبيبه

طويل افراقي .. و جبيره اشواقي

كأني بزينب من هسه صارت سليبه

حسن بجروحه

يوادع روحه

كسر بالخاطر و احساسي كسروا ضلعها

و اشوف حسيني

يتيم بعيني

على امه يناظر و احساسي كسروا ضلعها

⁦▪️⁩⁦▪️⁩⁦▪️⁩⁦▪️⁩⁦▪️⁩

يكل احبابي .. طويت اكتابي

دعيت الباري ينسيني و احاول انسه

جبيره اوجاعي .. كسر بشراعي

سفينة و تاهت و بضلمه و ما الها مرسه

اشوف القادم .. زمان الظالم

كأن طف ولدي و حتوفه بدوها هسه

أشوف الخاين .. علينه يعاين

يعد جيوشه و خيوله و الدنيه خرسه

يزيد و حزبه

و شرارة حربه

بدت هجماته و احساسي كسروا ضلعها

الغدر بالزهره

على ابني و صدره

اثر لمساته و احساسي كسروا ضلعها

⁦▪️⁩⁦▪️⁩⁦▪️⁩⁦▪️⁩⁦▪️⁩