ماريدك تعودني (مكتوبة) - باسم الكربلائي
قصيدة : ماريدك تعودني على بعادك
الشاعر : سيد عبدالخالق المحنة
الرادود : الحاج ملا باسم الکربلائی
المناسبة : ميلاد الامام المنتظر عج
ليلة ١٦ شعبان ١٤٣٩ هـ - حسينية العاشور
ما اريدك تعودني على بعادك
ما اريدك تصبرني لميعادك
ارجع لي اوج روحي لميلادك
يا مهدي ..يا مهدي
******
عودتني على انتظارك
بلكت تعودني اشوفك
مرة واجهني حقيقة
ما ردت لمحت طيوفك
اعترف لك ما عفتني
واني خادم ما اعوفك
ردتك ولو لحظة تمر
واحسبها لك جيت عمر
ازعل ودور لك عذر
واني ما اعرف ظروفك
مو كافي تعلمني على غيابك
مو كافي يهل دمعي على بابك
مو طبعك تبچيني على عيادك
يا مهدي ..يا مهدي
******
ما تجيني اليوم لكن
انتظر باچر وباچر
وشكثر ناس لتگلي
ما يرد ليك ليسافر
اطوي صحراء انتظارك
والتفت يم المنابر
بلكت اثر بلكي ضوا
بلكت تمر نسمة هوا
بلكت يرف اللوا
گاعد احسبلك واناطر
مو طبعك تفزز لي جراحتي
مو طبعك تضيعني بمتاهاتي
ما اريدك ترخصني لحسادك
يا مهدي ...يا مهدي
******
يا بو صالح انت وينك
وينه عنوانك دخيلك
مو فرق عندي المسافة
مو مشي اركض واجيلك
المهم عندي يا غالي
يلتقن ناري ويَ ليلك
من اشوفك يا بو صالح
انا اعرفك بالملامح
الهاشمي من دمه واضح
مبين من اعجاج خيلك
يا ساعة تخلصها معاناتي
يا ساعة ترجعها ابتساماتي
والباري يقدرني على اسعادك
يا مهدي ..يا مهدي
******
الحلم طوّل يا مهدي
وانت شو طوّل رجوعك
من ارش بابي بدموعي
ما شفت جمرة دموعك
هاي اصابع ايدي تشهد
تنشوي من اشعل شموعك
اضوي شمع درب السفر
بالوادي وبوسط النهر
مو ذبّل عيوني السهر
وانشد الغيم لطلوعك
ما تنظر يا مهدينا محبينك
يا الغالي يلقبونا مجانينك
ما جاوب بعد گلبي اذا رادك
يا مهدي ..يا مهدي
******
ينتهي ليل المدامع
يبتدي ليل انتظاري
والعمر ضحكة شماته
وجيتك رد اعتباري
لهفة العطشان بيه
وگاعد بشمس الظهاري
وامتاني جيتك يا ورد
طفيني يالچفك برد
كل ليسافر شو يرد
وانت تاركني عله ناري
ارجع لي دخيل الله يا مهدينه
ارجع لي يبس وردي وبساتينه
ارجع لي سأل جرحي عله ضمادك
يا مهدي ..يا مهدي
******
قالو الجيتك علامة
وهوستها خوتي وينه
هوستي تسمعها زينب
حتى ما تبقى حزينة
سمعي يا زينب الهوسة
ويستمع حامي الضعينة
بيّن مهدينا وسلّ سيفه
راعي الدنيا وكل شي بكيفه
هوسّنا والهوسة انتهت
يا وسفه خيلك ما اجت
ما قول زينب ايست
قالت المهدي يجينا
يا صبرك ولا نصبر على فراگك
يا صبرك ولا تحضر لعشاقك
يا ساعة ترد حارس على بلادك
يا مهدي ... يا مهدي
التعلیقات