بعد أخوتي (مكتوبة) - باسم الكربلائي
القصيدة : بعد اخوتي
الشاعر : السيد سعيد الصافي الرميثي
الرادود : الحاج ملا باسم الكربلائی
المناسبة : رثاء السيدة زينب (ع)
ليلة 21 رجب 1440
جامع و حسينية الرسول الاعظم_ بغداد
بعد اخوتي .. ليلي موتي
من يجن
ذكرياتي ..ابكل حياتي
بس حِزن
راح اسولف قصتي
من بداية رحلتي
******
كل بداية قصة توصل للنهاية
و اني قصة حزني ما زالت بداية
صبري عبرت مدته احدود الكفايه
دمعي سال ابگد نزف دم الضحايه
حتى گبري .. يحفه صبري
ابكل وكت
من اجوني .. ايطيحوني
ما طحت
الله حافظ هيبيتي
من بداية رحلتي
******
يا زمان القاسي ما تگدر تذلني
طبعي من طبع الحده اضعوني و كفلني
و الاميرة اعله النساء الله الجعلني
و ابنعش صبري الوحي الگبري حملني
گدري عالي .. اشما بدالي
امن الدهر
الغربة داري .. و راعي ثاري
المنتظر
هو يدري ابمحنتي
من بداية رحلتي
******
رحلتي البيها انطوت صفحة سنيني
و انتظر موتي اعله يا ساعة و يجيني
من كثر ما مشتد ابروحي حنيني
سكته ابضلوع الگلب احبس ونيني
حيرتني .. و شيبتني
كربله
و الجفوني .. كلفوني
ابعايله
شلون اوّصف حالتي
من بداية رحلتي
******
آخر ايام السبي ابعمري الشفتها
وي رقية ابديرة الشام ادفنتها
و الزمن ردني الهمومي الفارگتها
و الرماح و روس اخوتي اتذكرتها
و اليتامه .. و جم علامة
اتذكرت
لو بديه .. عن رقية
ما رحت
رافگتني ابطلعتي
من بداية رحلتي
******
ذكريات الماذي ردتني المصابي
لاحت اگبالي صور رحلة عذابي
عن اخوتي اتذكرت مدة غيابي
و للتكفلني نويت ارفع عتابي
خل يجيني .. و تربي عيني
الجيته
من ندبته .. هذا وكته
و عازته
بأسمه جانت لهجتي
من بداية رحلتي
******
انه وين الگه اليصل للغاضرية
لو وصلها ينادي وين اهل الحميه
هم وصل ليكم خبرها الهاشميه
اتنازع ابغربة على افراش المنيه
ضاع املها .. و حان اجلها
الصابره
حالة صعبه .. ابديره غربة
امحيره
جنت اريدن موتتي
من بداية رحلتي
******
اني مثل امي اريد ايشيعوني
ابليلة ظلمة ابلحدي خلي ينزلوني
و لا يسمعون ابخبر موتي السبوني
انتظر شيعة علي باجر يجوني
ابعازهم .. عن وفاهم
گال ابوي
انتظرهم .. و ابصورهم
عطر اخوي
بيهم اجبر غربتي
من بداية رحلتي
التعلیقات