لاتغمض عينك (مكتوبة) - باسم الكربلائي

القصيدة : لا تغمض عينك
الشاعر : زين العابدين المرياني

الرادود : الحاج ملا باسم الكربلائی
 المناسبة : استشهاد امير المؤمنين علي (ع)
 الزمن : ليلة 21 رمضان 1440 هـ
 المكان : حسينية الحاج داود العاشور

لا تغمُّض عينك
تگعِد اِمْتانِينك
يابُو احسين يابُو احسين
******
طير اللّزم ثوبك گال لا تگصد
هذا اليوم أجِّل روحة المسجد
تغبش عاليتامه الفجِر عالموعد
مو بحْسابنه هيچي اِبْدماك اِترد
ما تمر بيْتَامك
ما تكمْل اِصيامك
يابُو احسين يابُو احسين
******
الفقره اتگول يا مولانه عايفنه
لو هم أكو فُقره اِهناكه بالجنّه
لو مسألة موت اوإله تتعنّه
نمشي اوياك هم للموت نتمنّه
الموت بيدك رايه
وانته اخذنه ابهايه
يابُو احسين يابُو احسين
******
جمعتهم مثِل سبحه قُرُب بابك
حيدر لا تگطعه الخيط بغْيابك
خافو لا تروح اوباسو اترابك
واتيتْم الأرض والبيها بمْصابك
واليعوضك محّد
خلّتك ما تنسد
يابُو احسين يابُو احسين
******
أمين الوحي عالحَسْنين يتصبّر
الباقي ابراسكم راس الولي مطبّر
وايگل للحسن الله ابأمر قرّر
بيدك خبزة الفقره بعد حيدر
احْسين يورث بعدك
هالوراثه العندك
يابُو احسين يابُو احسين
******
بچه حتّه العرش مدري شنو الحاصل
أوّل مرّه گالو يبچي ابو فاضل
جبرائيل نازل صاعد اونازل
أظن ياخذ الربّه المدمع السّايل
والملائك تنحب
لجِل مدمع زينب
يابُو احسين يابُو احسين
******
يالوصّيت إبنك يمتلك صَبْره
احسين اِيخاطبك وايذكرك اِبذكره
توصّينه اِبْصبر واجْزعت هالمرّه
صحت أسماء بسّ اِلجزع للزّهره
لا صبر عالزّهره
اوعله اِمصاب الطّبره
يابُو احسين يابُو احسين
******
خطّار اليتامه اِتعنّو الدارك
اوما سمعو هله ابهاللّيله خطّارك
يگولون اِبْفرَح كل عام نِتشارك
او ماتت ويّه حيدر عيدك اِمبارك
والفرحته اِبْعيده
ظلمه يِصبَح عيده
يابُو احسين يابُو احسين