يا نار الحشر (مكتوبة) - باسم الكربلائي

قصيدة : يا نار الحشر
للشاعر : ناظم الحاشي
المناسبة : ليلة 5 محرم 1441ه
المكان : ديوان الكفيل لندن

يانار الحَشُر .. بَلْغي الأمُر
موت العِده إبكيفي
لوحَلْ الغَضَبْ .. دَمهُم حَطَب
يشعِل صَبُر سيفي
بثنين أعتِلي .. عباس وعلي

*****
عَنّي بَلغيهُم هاشِمي القائِل
مايضل مجنون يحكُم العاقِل
مُسلِم إسرافيل عالأرُض نازِل
يبدي نَفْخ الصور لوبِده إيقاتِل
تنگُلُب بالكون دنيه بالكامِل
لو تِنَخّه وصاح يآ أبو فاضِل
حرب حرب حرب
حرب حرب حرب وجودي
علنوهه الحَرُب .. رفضو كِتُب
حِلفَو عَهد عَنها
ذوله أهْل الغَدُر .. وَهل المَكُر
وَالله أنتِقِم مِنها
هذا اليوم إلي .. عباس إوعَلي

*****
رَبّي خالِقني طَبعي عَبّاسي
ما أدَنِّگ راس حَتَه يَم راسي
ويل كِلمَن ويل يجرح إحساسي
قَسوَة الكرار بالحرُب قاسي
من غَضَب عباس كِلشي ماناسي
أحرِگ الخَيّال مِن هَوَه أنفاسي
خَطَر خطر خطر
خطر خطر خطر وِجاهُم
مِحتاره البَشَر .. هذا الخَطَر
عالكوفه مِن طَبها
هَل مُسلِم نِزَل .. لو مُحتَمَل
نازِل غَضب رَبها
لو قادِم وَلي .. عباس إوعَلي

*****
صادِر إمْن إحسين هذا تَكليفي
قابض الأرواح وآخِذ إبكيفي
هذا يوم الثار يوم أرِد حيفي
لو أذِّب الروس لو أذِب سيفي
من إجاني الموت زاد تَشريفي
ضيفي عِزرائيل ياهَله إبضيفي
أسَد أسد أسد
أسد أسد أسد عَليهُم
عَبّاسي الطَبِع .. لو تِجتِمع
كِل البَشَر ضِدّي
صَگار الزِلم .. بيّه العَزِم
وأفْني الزِلم وَحدي
ليث إومِن هَلي .. عباس إوعَلي

*****
كِل وَلَد عالخال ماهي تِعنيني
جندي لَجْل إحسين علي إمرَبّيني
ثِلثي مِن عَمّي وثلثي لحسيني
يَعني للعَبّاس بيّه ثِلثيني
تِرجَع إبلا راس من تلاگيني
وَالله إذا حَطّيت عينك إبعيني
عَلي علي علي
علي علي علي نِدائي
مَصدَر قُوّتي .. كِل غيرِتي
مِن عَمّي تَكويني
هاشِم مَصدَري .. دَم حَيدري
يجري إبشرايني
عَزمي إومَنهَلي .. عباس إوعلي

*****
ياعَلي إدْرِكني مِن صِحِت بيهُم
چَن صِحِت للنار هاچ إحرگِيهُم
إِلّا أدوس إخشوم وإِلّا أبَچّيهم
أبدي بأوّلهُم وأنهي تاليهُم
صَگُر فوگ الخيل نازِل إعْليهُم
لَمَن عِفْت الروس بين رِجليهُم
غَضَب غضب غضب
غضب غضب غضب شعوري
يَحسين الأرُض .. بيهُم فَرُض
مِن أزعَل أفنيها
إولا طِفلَه إبْسَبي .. يَبْن النَبي
تِنجَر تراچيها
وآني إبْكاهِلي .. عباس اوعلي
*****
بيت أبوطالب ماعرف خِلّه
مَرّه عِدنَه الموت بالعُمُر كِلّه
إِعْفي يَبْن إزياد والله ماگِلّه
ذِلّه وأهل البيت نرفُض الذِلّه
أنزِل إبلا راس وأقبَل السِلّه
إوْلا عَدِل مَذلول راسي ينزِلّه
رَفُض رفض رفض
رفض رفض رفض نهائي
ثابِت مَوقِفي .. وآني أكتِفي
واگف جبل عالي
لوسيف القَدَر .. فوگ النَحَر
ماينشِغِل بالي
والموقِف جَلي .. عباس إوعَلي

*****
بالگَلُب دَگْتين مَيّزَن حُبّي
يا حُسينْ إيصيح مِن يدِگ گَلبي
إودَگّه ياعباس تِمحي كل تَعبي
بيهن إمن النار ينغفر ذنبي
لومَه حُب إحسين تَيّهِت دَربي
إولا عِرَفْت إشلون ينْعِبِد رَبّي
عِشِگْ عشگ عشگ
عشگ عشگ عشگ حُسَيني
لِحسين العِشِگ .. هذا الصِدِگ
هذا العِشِگ كِلّه
للرايد يحِب .. والحُب عذِب
حُب يرفُض الذِلّه
بالعِز مِمْتِلي .. عباس إوعَلي

*****
مِن دَواهي الكون يَبن مَرجانه
يِعْلَه صوت إنسان مِثْلَك إويانه
لو إملاگَه إسيفوف بيها تِلگانه
اليحْچي مِثلَك هيچ نِگطَع إلسانه
رَبنه خالقنه نحمي قرآنه
ودمنه لَجل إحسين يجري شريانه
فَخَر فخر فخر
فخر فخر فخر ولائي
آني أوّل خَبَر .. يكسر ظَهَر
سِبطْ النَبي إبموته
راسي المِرتِفِع .. ضَل ينْسِمِع
هيبَة علي إبصوتَه
بالَحق مَنزِلي .. عباس إوعلي