مشتاقه لك (مكتوبة) - باسم الكربلائي

قصيدة : مشتاقه لك

الرادود : الحاج ملا باسم الكربلائي

لشاعر : محمد العقابيي
المناسبة : ليلة 21 محرم 1441 هـ
حسينية ام الحسن موكب اخوة زينب - الفاو

مشتاگه ألك لاكن أشوفك بس جرح
حوبة رقيّه ان شاءالله اتعثْر اِلرّمح
*****
عِشنه سوه اوخويه صدِگ 
أبرالك اوتِبرالي 
تاليها تخْتِمها ابرمح 
وايظَل مكانك خالي
اوبالْف اِوتسعميّة جرح 
خلّيت لچمه ابّالي
والغالي كلما ينلچم 
معناها ذِبحوا غالي
رغم الجروح البيك بس وجهك صبح
حوبة رقيّه ان شاءالله اتعثْر اِلرّمح
*****
متعوّد اِعليّه چنت 
واِعليك متعَوْده آني 
عِشرة عُمر عشنه العمُر 
واحد گلُب للثّاني
والدّهَر خلّاك اِبرمح 
وآني ابسبي خلّاني 
يالذبحك اكثر مِن وجع 
سوط اِلشّمر أذّاني
ابْكل خطوَه يا خويه أشوفك مِنذبح
حوبة رقيّه ان شاءالله اتعثْر اِلرّمح
*****
يا خويه من طبْع اِلأخو 
لو غاب ي کسر اخته
هذا اِنته اشوفك بس نحَر 
لو ما أصدّگ إنته
سولفلي يالكلك جرح 

شمْسويَه بيك اِلسّكته
ماريد اسولفك عتَب 
خويه العتب مو وكته
ليل السّبي ما چان وي راسَك سمح
حوبة رقيّه ان شاءالله اتعثْر اِلرّمح
*****
كلما أميل امن الضّعن 
سوْط الضرب يدفعني 
امْن الناگه سهله لو طحت 
بس صعبه اليْرجّعني
توجعني اديّه امن الحَبَل 
لو نحرك اليَوجعني
ما أدري إلمن أشتكي 
او بسّ الرّمح يسمعني
بس أدري طولك بالسّبي لا ما يصح 
حوبة رقيّه ان شاءالله اتعثْر اِلرّمح
*****
ما أدري شاَشْكيلك بعَد 
هوّه اشبقه امْن امتوني
وداعة بناتك بالسّبي 
خلّصت ماي اعيوني 
والبُگه ابراسچ مَسْمعت 
بس اسمع ايْشتموني
او كلما اباوعلك گمِت 
عن راسك ايدفعوني
عالرّمح دمّك لو وگع ما ينمِسح
حوبة رقيّه ان شاءالله اتعثْر اِلرّمح
*****
معقوله چي بيهِن رمل 
يا خويه حَمْره اعيونك

معقوله مِن گدّ اِلعطش 
ذِبلَت ملامح لونك
واشلوني اگلّك مو مُهِم 
ياخويه أنته اشلونك 
فوگ الضّمه او حَرّ الهوَه 
اعْله اشفافك ايضربوك
لاني شفِت بجْرُوحك اِتراب اومِلح
حوبة رقيّه ان شاءالله اتعثْر اِلرّمح