آني والكافل (مكتوبة) - باسم الكربلائي
قصيدة : اني والكافل
الشاعر : السيد عبد الخالق المحنه
الرادود : الحاج ملا باسم الكربلائي
المكان : هيئة جواد الأئمة ، العزيزية واسط
المناسبة : الليالي الفاطمية ، ليلة 4 جمادى الأولى 1442
اني والكافل گعدنه
اِو صادفت دورة سنتها
من سألني عالمصيبهْ
حاله حاله فصلتها
أقترب من النهايهْ
كلي عيدي اِمن البدايهْ
******
تمر دورة سنة أمي
علينه اِبكل مآسيها
لچن هاي السنه آختلفت
أبو فاضل حضر بيها
بديت اَشرحله و دموعي
على اِچفوفه يخليها
اذا گتله بچه حيدر
يگلي خويه عيديها
عالرجل أعظم مصيبه
ينهظم يمه حبيبه
والمثل حيدر ابونه
ينظر اْو يسكت عجيبه
گتله يا كثر الرزايا
گلي عيدي اِمن البداية
******
وكت جان الضوه عدنه
وهمه ليلهم دامس
بشر عيشتها عالفوضه
لذلك طعنوا الحارس
إجوا مثل الورگ بالسيل
عمايه اْو تركض اِبواهس
ثلث ميّه الحطب شالوه
حطب مثل الگصص يابس
حاطوا البيت الحماهم
والخجل خلوا وراهم
چن خفافيش المغاره
هجموا وخنگوا ضواهم
كل تفاصيل الجنايه
گلي عيدي اِمن البداية
******
يريدون الجبل ينزل
غصب ويبايع الحفره
ولا يقبلها ذو الفقار
يبايع خنجر الغدره
قرار الناس والمو ناس
قرار الفشلوا العثرة
اذا ما يخرج يبايع
نوّج البيت عالزهره
والوفي ابوكت الخيانه
مو سهل چان امتحانه
لو يضحي بالرساله
لو يضحي بالامانه
سكته جانت بيها غايه
كلي عيدي امن البداية
******
بدت نار الحقد تصعد
واجونه عيونهم صلفه
ثگيله الباب من اجذوع
دفعها الظالم ابچتفه
زلم تدفع زلم ترفس
يخويه وفاطمه ترفه
ترافة امي چالورده
عصرها اللي خشن گفه
واحد ابرمحه دفعها
واحد اعله الخد صفعها
واحد الشتم ابوها
من بعد كسر ضلعها
هجمه واثنين الضحايا
گلي عيدي امن البداية
******
يبو فاضل ذبحنه الليل
يهيّج اجروح من يجن
اجاني حسين مكسور
ابن وعلى الحنينه يحن
يكلي خويه خل ندعي
يزينب بالدعه نأمن
دعينه الله يعوضنه
اخو ثالث عگب محسن
ادعي يا زينب امانه
الله يتقبل دعانه
والاخذ محسن يزينب
ينطي عباس ابمكانه
كافل واخ وحمايه
كلي عيدي اِمن البدايه
******
عجيبه اطباع دنيتنا
حچيها ابكبر سكتتها
عجيبه البالضحى انكتلت
تصير ابليل دفنتها
والاعجب مطلب الچتال
طلب يمشي ابجنازتها
اثاري الناس ميته تعيش
اذا تذبح كرامتها
عادت اليفگد غوالي
مگبره تصبح حياته
والدفن بيده حبيبه
راحته تصير ابمماته
للحديث تظل بقايا
كلي عيدي امن البدايه
******
كأن من شال نعش امي
خجول او للعتب رايح
يشوفونه رمح واگف
واشوفنه دمع طايح
وره نعش أمي ماكو اصياح
أثاري السكته هم صايح
سبايه تكول مو تشييع
عطاشه والدرب مالح
و المشه ابنعش الوديعه
يستعد للغاضرية
وادري يا عباس اجرحك
لو كلت زينب سبيه
من جبت طاري السبايه
كلي عيدي امن البداية
******
بچه العباس من گتله
چبيره دمعة الوالد
نهض زعلان و اجفوفه
يطگهن واحد بواحد
گلتله اسم الله يالغالي
نهر وياك متواعد
يگلي براسي نار الباب
يخويه والنهر بارد
گتله يا راعي الحميه
فدوه لچفوفك اديه
من يصيب السهم عينك
تنشلع عين الزجية
عالنهر تبدي الحكايه
كلي عيدي امن البدايه
التعلیقات