قامت القيامة (مكتوبة) - محمد الجنامي

 

 

قد قامت القيامة 
هذا الامر صار الحشر يالرايد علامه 
ما تنفع الندامة
ضنوه علي جنه علي وبيده شهر حسامه 
صوب النهر تقدم .. سيفه غضب جهنم 
             العبــاس العبــاس

سمع صيحات العطش زينب الحره تگله يالغالي 
جيبلي ماي النهر يالگضيت العمر كله تبرالي 
شكد كلتلي اعله النجم الخاطر عيونج انزله ومو عالي 
هسه اريد المشرعه وادري راح تگول سهله لعيالي 

وهالكلمه من سمعها 
غيره اشتعل نار بجبل رايه علي رفعها 
بچفه مسح دمعها 
صاح الگمر شنهو النهر و القارعه قرعها 
بجود الوفه تحزم .. سيفه غضب جهنم 
                العبــاس العبــاس

لاح بعيونه الغضب واشتعل يم اخته غيره ايحاجيها 
وداعة امج فاطمة ما تظل بوجودي حيره انسيها 
جن ركب ظهر السمه وصارت الدنيا زغيره مغطيها 
كلشي جدامه زغر وزينب بعينه جبيره مخليها 

نزلت اله المنايه 
لمن هجم كلشي انهزم وبجفه احلى رأيه 
و انعرفت البدايه 
حان الوعد لكن بعد ما نعرف النهايه 
جاء العذاب الاعظم .. سيفه غضب جهنم 
              العبــاس العبــاس

غيم بطف كربله والسمه اعليهم منايه مطرها 
ماعرفنه بيمنته مدري كوكب مدري رايه ننظرها زغيره جانت كربله ومن تقدم عالسرايه كبرها 
لآن مهره لو سحگ الگاع تتمدد هوايه و يحفرها

طب الها فدوه لاسمه 
ضاع النفس وجها عبس والحومه كلها ظلمه 
من گلبه شال الرحمه 
وسط الحرب لمن يهب مثل الهوه شيلزمه 
صال و عليهم دمدم .. سيفه غضب جهنم 
                العبــاس العبــاس

ابو فاضل لو خطف يظل واحدهم يدور عن رأسه 
واگفه تموت الزلم و اليجي بسيفه يطير انفاسه 
حسين عاين وابتسم لان بالمعسكر يطشر عباسه 
النهر يتراجف بقى بعد ما تگدر تسيطر حراسه 

نار الغضب علگها 
ذب الزلم فوك الزلم و المعركه حركها 
ماكو نفس خنگها 
شال العده بمهنده واعله الارض يطكها 
و الطشره ما يلتم .. سيفه غضب جهنم 
               العبــاس العبــاس

وكف يم المشرعه صاح يا عسكر شمركم ماشوفه 
هذا آنه خلي يجي تملكت بيدي نهركم وجروفه 
آنه وحدي اعله النهر وينكم ومن الامركم بي خوفه 
ابن ابوي و قررت اخذ الماي وعمركم ما عوفه 

مثل الابو وكفته 
واكف جبل محد وصل باب النهر قلعته 
الماي العذب اخذته 
بجفي انغرف مني رجف ذليته ما شربته 
جود الكفاله زمزم .. سيفه غضب جهنم 
                العبــاس العبــاس

صاح راجع للخيم الصدگ زلمه من امامي ايلاگيني
مو يجيني من الظهر خل يجي ايكابل حسامي ايلاويني
البطل بس يوكف الي وانه بس اوصل خيامي ايتانيني 
لا يظل سد النخل لابد و بيه يرامي و يرديني 

السهم اليجي اگله 
استقبلك عيني الك بس جودي لا تدخله 
من عمري جودي اغله 
جفي وگع صوتي ارتفع الماي اريد اوصله 
بضرب العمد ما يهتم .. سيفه غضب جهنم 
                العبــاس العبــاس

للشاعر: وسام الشويلي