عزيز الله (مكتوبة) - محمد الجنامي

 

 

يماخذ كل شعوري ومالك احساسي
لگيتك كل وجودي وشهگة انفاسي
يشمس الله شكثر غيم الحقد حاول يحجبك
بقيت ابهيبتك وابكل زمن تلگه اليحبك
عـــزيـــز الــلــه ... عـــزيـــز الــلــه 

كلام اهـواي ... المضى والجاي
ولگيت الكل سؤال بكربلاء اجواب
نعم يحسين ... مثيلك وين
على طول الزمان محيّر الألباب

العقل والعاطفه اجتمعن
عليك وما لگن غيرك
وانه ابدربك عرفت الله
وعرفت الخير بس خيرك

اذا مو كربلائك مَعرفت ديني
شفت غيرك وَلكن ماترس عيني
ذبيح ومامتت قائد تظل واتحامي شعبك
بقيت ابهيبتك وابكل زمن تلگه اليحبك
عـــزيـــز الــلــه ... عـــزيـــز الــلــه 

سمعت الصوت ... وعرفت الموت
حياة بكربله تحوّل لأن مر بيك
ابصـفاتـك هاي ... رويت الماي
يبو اليمه صلاة الله وسلامه اعليك

عطش دين النبي گبالك
وچنت يحسين انته المَي
أمامك مات واحيته
ومنّك صار كل شي حّي

قريت الآيه بسمك والوحي ابصوته
يگول انت ابيمينك تحيي الموته
من الدنيا انشطب چم طاغيه الحاول يشطبك
بقيت ابهيبتك وابكل زمن تلگه اليحبّك
عـــزيـــز الــلــه ... عـــزيـــز الــلــه 

اليريد اشهود ... عله المعبود
اگلّه حسين يكفيني عَليه شاهد
أنـــه لـــولاك ... اعيشن شاك
ولا اعرف منو الخالق شنو الواحد

بالعاشر يمن صلّيت
أنه لولاك ما اصلّي
 اكو خالق البهذا الكون
 خلودك سيدي ايگلّي

عرفت ابتضحياتك منهو معبودي
أنه ابزودك عبدته وكلمتك زودي
الهك اكرمك وانطى وعد ميضّيعه تعبك
بقيت ابهيبتك وابكل زمن تلگه اليحبك
عـــزيـــز الــلــه ... عـــزيـــز الــلــه 

أحبـك حـيل ... نهار وليل
اسولف بيك واحروفك سوّر قرآن
العليه اذنوب ... ويريد إيتوب
يجي البابك يدگه وياخذ الغُّفران

تعنيتك يباب الله
وأشوفك كل وكت مفتوح
وبعد ما اغرگ ابذنبي
مادامك سفينة نوح

إلك وجهتُ وجهي وسلمت روحي
ازورك ياحبيبي ابدمعتي ونوحي
اشكثر رادوا ازل وابخطوتي ما امشي دربك
بقيت ابهيبتك وابكل زمن تلگه اليحبك
عـــزيـــز الــلــه ... عـــزيـــز الــلــه 

حزن عاشور ... ابدليلي إيدور
وأشوفك وحدك حاير بلا عباس
عله الـتـربان ... طحت تعبان
العطش دخانه ظل يطلع مع الأنفاس

گد ما يابسه اشفافك
كوه امن العطش تحچي
وإتعاين زينب إعله التل
تنادي إبإسمك وتبچي

أشيگومك للعقيله تنزف اجروحك
وإهي إتشوفك يخوها إتنازع ابروحك
اويلي والسهم من حرمله صار إعله گلبك
بقيت ابهيبتك وابكل زمان تلگه اليحبك 
عـــزيـــز الــلــه ... عـــزيـــز الــلــه 

الـــف يـا حــيــف ... الشمر بالسيف
إجاك ابلا رحم وبرجله يرفس بيك
إعله صدرك داس ... گطعلك راس
يگلك ها يظامي سيفي اليرويك

هذا انت ابو الرحمه
هيچي صاير ابحالك
راسك ع الرمح مرفوع
وخيل امطشره اوصالك

شگول وإلها ونه كسرة اعظامك
على راس الرمح وإتعاين إخيامك
طريح إعله الثرى والناصبي إثيابك يسلبك
بقيت ابهيبتك وابكل زمان تلگه اليحبك 
عـــزيـــز الــلــه ... عـــزيـــز الــلــه 

للشاعر: وسام الشويلي