إذا ما جاوبك نحري (مكتوبة) - باسم الكربلائي

الشاعر : الأدیب حمزة السماوي

إذا ماجاوبك نحري .. اجابك نحري من زغري

ربيت وياك .. نسيت انساك
******

يعبـرّة كُـلَ مؤمن من يمر إسمك
انه الماعندي حظ وماچنت يمك
إذا ماجاوبت يوم الوگع جسمك
جاوبتك نعي وأسمع ونين امك

إذا مو وكتي وسنيني .. حضرت ابسمعي وبعيني

واگول هناك .. نسيت انساك
******

سمعتك تركض اعله الاكبر وحاير
سمعت ابحالك اعله وليدك اشصاير
إذا ماجاوبت ذاكه الوكت باچر
اجاوب بالمشي وبرگـضة العاشر

افّطر بالضمه اشفافي .. وجوابي أدري مو كافي

عمر يفداك .. نسيت انساك
******

شهر عاشور يخلص وانه مانايم
حرام النوم هاي الفترة عالخادم
وجوابي من سمعتك تبچي ع القاسم
بعزه الزنجـيل صينية شمع لازم

حزن ماله اول وتالي .. صحيح ابن الاخو غالي

حِچّه ونـاداك .. نسيت انساك
******

شجاوب من صحت وينك يبوفاضل
شجاوب ع الشريعة ظهرك المايل
لون شرعاً يجوز ابـليـلة الكافل
أگطع چفوفي للعباس يستاهل

إذا ماشايف وسامع .. اطين وجهي بالسابع

ردت مرضاك .. نسيت انساك
******

ماجاوبت بيوم اطلعّت وحدك
ابيوم الچان بي حتى الهوه ضدك
اجاوب من اجي لزيارتك عندك
الطم خدي بس مايوصل الخدك

اشكثر اتمنى بحلامي .. اشربك ماتضل ضامي

بحلم لُقياك .. نسيت انساك
******

افكر بالجواب واعجز واتعـب
شجاوب صدرك وبالخيل تتگلب
تون مابيك حيل اتگوم ومترب
شجاوب غيرتك من سلبو زينب

تمنيت اختي مسبيه .. ولا محتاره علويه

السبي آذاك .. نسيت انساك
******

اشما اختم كلامي وياك اريد ابدي
جوابي يصير كله ابطلعة المهدي
انه وامي وابويه واخوتي وولدي
فدوة انروحلك يا اغلى ماعندي

شنو تأمرني بالخدمه .. تضل انته ولي النعمه

ابو الأفلاك .. نسيت انساك