اسد غالب (مكتوبة) - باسم الكربلائي

 

 

ياعلي..من صبر گلبك يالصبرتني
ياعلي..يا أسد غالب لو شيعتني
ياعلي..لا تدليهم وين إدفنتني

أسد يا سد يا قالع باب خيبر
يكرار الكريهه الما تكرر
كثر ما گلبك الصابر تصبر
الصبر مل من صبر گلبك يحيدر
لهيب الحاطمه بصدرك تسجر
وأشوف الكوثر بعينك تفجر
ياعلي..بلوعة مصابي ما فارگتني
ياعلي..بدمعة عيونك لو غسلتني
ياعلي..لا تدليهم وين إدفنتني

محمد والدي بيوم الفگدته
جنابك وحده واساني بمحنته
تخلت كلها بس انته الحضرته
يحيدر جهزت نعشه ودفنته
وابويه من چنت ابچي الفرگته
گبل جفني يصب جفنك دمعته
ياعلي..بمدفن الهادي من شاركتني
ياعلي..هالبشر كلها محد اجتني
ياعلي..لا تدليهم وين إدفنتني

يمن سرك لغز للإسم الاعظم
صبر باري السمه بصبرك تجسم
بهجوم الگوم ضلعي من تهشم
أحس مو ضلعي چن ضلعك تألم
عليك تحالفوا دنيتك والهم
جبل صبرك علم بمصابي تهدم
ياعلي..هشموا ضلعي بعينك شفتني
ياعلي..همه ضيعوني وانته احفظتني
ياعلي..لا تدليهم وين إدفنتني

خذت دمعي ومصابي ونار الاشجان
عفت بيتي وسكنت ابيت الاحزان
أحومن وألتفت وبگلبي نيران
وأعاين رسم وجهه على الجدران
صحت يا بيت الأحزان الدهر خان
تمنيت اللحد وأسكن التربان
ياعلي..بالچفن بيدك لو چفنتني
ياعلي..وبوسط گبري لون نزلتني
ياعلي..لا تدليهم وين إدفنتني

مثل ما ودع المختار عمره
أودع عمري وبدلالي حسره
بعد ساعه الاجل يلفيني أمره
تصيح الناعيه ماتت الزهره
مثل ما للرسول احفرت گبره
أريد بچفك الگبري تحفره
ياعلي..عالهضم وعالهم ما عودتني
ياعلي..باللحد بيدك لو وسدتني
ياعلي..لا تدليهم وين إدفنتني

يحيدر لاحت علوم الرزيه
وتفصّل بينك وبيني المنيه
گبل ما هالأكل ياخذ بديه
الك يا ابا الحسن عندي وصيه
بليل ادفني يا حامي الحميه
معالم گبري خليها خفيه
ياعلي..بآخر موادع لو ودعتني
ياعلي..وبترب لحدي لو غيبتني
ياعلي..لا تدليهم وين إدفنتني

 

للشاعر:جابر الكاظمي