دمع عيونج (مكتوبة) - باسم الكربلائي

 

 

يا دمع عيوني .. يا ضي جفوني
حضرت شموع من ضلوع هاي الليلة
حنيتك بيدي .. بعرسك يوليدي
ودعني وروح يالمذبوح هاي الليلة

مو وكت الفرح لكن تروح بهيبه اريدك
نص دينك كمل باقيله نص من دم وريدك
سيفك يمه خل ياخذ اثر من حنة ايدك
ابرز وارتحز واهجم فخر والدم نشيدك
وفيت بدمي .. ضحيت العمي
يا في خيالي .. يا راحة بالي
يا تعب ارباي يالوفاي وابني الغالي
تبعد وجروحي .. تلتم بروحي
دمعي ابفرگاك عن ارباك راح احجيله

يا دمع عيوني .. يا ضي جفوني
حضرت شموع من ضلوع هاي الليلة
حنيتك بيدي .. بعرسك يوليدي
ودعني وروح يالمذبوح هاي الليلة

يبني الخوف الباطل لمن صد اعل سيفه
يبني الما نهر سائل وصل گاصد مضيفه
ذاك اليجسم العايل مثل چسمة رغيفه
لو هد تشرد الخيل الثگيله اويه الخفيفه
واتنخه بأسمه .. واتذكر عزمه
عرف هالوادم .. يا هو القاسم
يالفزاع شاب ما ترتاب انت ىالقادم
سيفك بيمينك .. لا تغفل عينك
يبن الصنديد ها يالحيد رد العيله

يا دمع عيوني .. يا ضي جفوني
حضرت شموع من ضلوع هاي الليلة
حنيتك بيدي .. بعرسك يوليدي
ودعني وروح يالمذبوح هاي الليلة

انت ابني ونظر عيني وتعب كل الليالي
لو يحجي الگلب يمه يجيلك يشكي حالي
صح غالي عليه انت وذخرتك ليه تالي
لكن هذا دين الله ووجوب اهديله غالي
ضويلي بشمسك .. يالعايف عرسك
يا نسمة ريتي .. شوگي وحنيتي
ام وربيت لو وفيت ترفع صيتي
هد مثل الكفال .. عمك يستاهل
سيف ابيمناه هد وياه عدل الميله

يا دمع عيوني .. يا ضي جفوني
حضرت شموع من ضلوع هاي الليلة
حنيتك بيدي .. بعرسك يوليدي
ودعني وروح يالمذبوح هاي الليلة

يا يمه الفگد جمره ويظل يلهب لظاها
الله يعين المضحيه بولد وانطت ضناها
مدري بيا نفس تگدر بعد تشتم هواها
لو يم الگبر توگف تمر صورة رباها
تحجيله ابعبره .. واتنادي بگبره
تعبني مصابك .. فك باب ترابك
ارد احجي وياك يمه انخاك تفتج بابك
يا نبرة صوتي .. دليني بموتي
يا ضي العين گلي منين واني امشيله

يا دمع عيوني .. يا ضي جفوني
حضرت شموع من ضلوع هاي الليلة
حنيتك بيدي .. بعرسك يوليدي
ودعني وروح يالمذبوح هاي الليلة

اقره الفاتحة يبني وتوكل بالسلامة
ادخل للحرب يمه امحياك ابتسامه
كون اسمع يگولون ابتسم من سل حسامه
صال وحارت الوادم مثل يوم القيامه
قتال ابحربك .. ما يرجف گلبك
حط بيدك رايه .. واقرالك ايه
عهدك لله لا تنساه هاي الغايه
لو سيف يلوحك .. اهملها جروحك
والجيش هناك لو لاگاك تعثر خيله

يا دمع عيوني .. يا ضي جفوني
حضرت شموع من ضلوع هاي الليلة
حنيتك بيدي .. بعرسك يوليدي
ودعني وروح يالمذبوح هاي الليلة

كل هذا الحجي الگلته جنت وي روحي اذكرك
انت استشهدت يمه ورحت عريس ابشرك
حنة جفك الدم ووصل للجنه عطرك
زينب گالت العمك يعظم الله اجرك
مذبوح موذر .. بتراب معفر
يا رفعة راسي .. بين اهلي وناسي
ضيك ما غاب يالما خاب بيك احساسي
عهدك وفيته .. بالدم رويته
دم لاگ البين لجل حسين وموفيله

يا دمع عيوني .. يا ضي جفوني
حضرت شموع من ضلوع هاي الليلة
حنيتك بيدي .. بعرسك يوليدي
ودعني وروح يالمذبوح هاي الليلة

باجر تقتدي بنصرك امم تظهر ورانه
وتضحي الشباب ال عالمبادئ والامانه
كل شاب الفزع مثلك اخذ مثلك مكانه
عرسه هناك بالجنه النبي يعقد قرانه
يتأثر بأمرك .. ويجرب نصر ك
زودك واثاره .. توصل اخباره
گلبك ينگال بيه امثال عن ايثاره
يا لون طيوفي .. يا صوت حروفي
عزمك ما لان والطوفان جارف سيله

يا دمع عيوني .. يا ضي جفوني
حضرت شموع من ضلوع هاي الليلة
حنيتك بيدي .. بعرسك يوليدي
ودعني وروح يالمذبوح هاي الليلة

 

للشاعر: السيد عبدالخالق المحنه