قسمنه (مكتوبة) - باسم الكربلائي

 

 

 

قسمنه والرفعها بلا عمد
قسمنه ما نعوفچ للابد

هیه کلمة ترضي الله بكل زمن نحچیها
فاطمه نور السماوي واحنه نؤمن بیها
هیه مثل الشرف عدنه واحنه ماننطیها
من غضبها یغضب الله یرضه للیرضیها
بالاصلاب صحنه یالزهره مدد
قسمنه ما نعوفچ للابد

انقلاب اعله الرساله وبقيادة جاهل
عرفوا الحق وي علينه جاهروا بالباطل
احنه شيعتكم يزهره ومانحب انجامل
احنه من يوم السقيفه لهالزمان انقاتل
المنيه عدنه احله من الشهد
قسمنه ما نعوفچ للابد

احنه دوم نبيع كلشي ونشتري مرضاتچ
هوه بس العنده غیره یشعر بمأساتچ
تبقه بعیون الروافض للأبد دمعاتچ
کل مسیة غروب يسمع كل محب دعواتچ
یزهره احنه وفینه الوعد
قسمنه ما نعوفچ للابد

احنه کل غاصب نگله بالوجه یاغاصب
مو جریمه لو حچینه بحق علي ونطالب
رافضه الله خلقنه ومانحب الناصب
صاحب الماوفه صاحب مانسمي صاحب
صحبته غايه والباري شهد
قسمنه ما نعوفچ للابد

المابچت لجل الزچیه عیني شلي بعيني
واني لو اتخله عنها يعني تارك ديني
فدوه عمري للبتول وكل هلي وبنيني
بحبها اتحده جهنم ادري ما تچویني
جهنم ماتمس هذا الجسد
قسمنه ما نعوفچ للابد

ركز عليه بتأني ياترى شتلاحظ
روحي اولاد الزچیه وقلبي بيهم نابض
اني ماخاف المنيه الله هوه الحافظ
قولوا شتقولون عني اني رافض رافض
يشيعي يحرسك الله من الحسد
قسمنه ما نعوفچ للابد

جفنها
الليالي ليش وي فاطم .. جفنها
بحر ونها ولامره .. جفنها
راحت للگبر وازرگ .. جفنها
(بحضورك ليش يا حامي الحميه)

يفضه
طوفان الدمع لجلچ .. یفضه
ومصابچ بس ابو صالح .. یفضه
الماصحتي علي صحتي .. يفضه
(انكسر ظلعي ووگع ابني من اديه)

 

للشاعر : سيد عبدالخالق المحنه