مظهر الحق (مكتوبة) - باسم الكربلائي

 

 

يا علي .. مُظهر الحق و العجايب
يا علي .. اشلون تحنيك المصايب
يا علي .. تبجي لفراق الحبايب
يا عليُ يا علي

ياللي بحروفك معاجز
فارس بعزمك تبارز
بلا درع و بلا حواجز .. شي عجيب
شايل الدنيه اعله راسك
وزعت رحمه اعله ناسك
الكون أصغر من قياسك .. شي عجيب
اشقد غريب الليلة أمرك
ياللي صبر الدنيه صبرك
شنهو صار و محني ظهرك .. شي عجيب
دمعتك تنزل غريبة
سولفت عن المصيبة
قلبك يودع حبيبه .. شي عجيب
ما بجيت .. إلا لله و لليتامه
مابجيت .. الليلة دمعاتك علامة
مابجيت .. و قلبك اعله الزهرة ذايب
يا عليُ يا علي

بالحرب ما تنطي ظهرك
تعرف الفرسان قدرك
أمر عزرائيل أمرك .. يا أمير
ما رجف سيف اعله جفك
ما تهاب اجيوش أعرفك
اشصار هاي الليلة أحلفك .. يا أمير
حزن دنية ابعينك إلتم
لو ضلع منك تهشّم
إي مصاب الزهرة أعظم .. يا أمير
حاير و لا باب تدفع
خايف المسمار يرجع
و اعله ضلع الزهرة يطبع .. يا أمير
بالشداد .. ما تهاب اللي اعتنالك
بالشداد .. لكن اليوم اشجرالك
بالشداد .. آخ يا عظم النوايب
يا عليُ يا علي

جمرة لو دمعه اعله عينك
عالمصاب الله اليعينك
يرجف الماي بيمينك .. بالوداع
قلبك المذبوح اسأله
النور هم ممكن تغسله
حالتك ما ظنها سهلة .. بالوداع
شاركت كلشي بحياتك
فاطمه اتعيش اويه ذاتك
الليلة حضرت ذكرياتك .. بالوداع
بالحزن كلمن نصيبه
دمعة الفارق حبيبه
تنزل بليل المصيبة .. بالوداع
بالدموع .. انت وياها اش حجيتو
بالدموع .. يا علي اعليمن بجيتو
بالدموع .. بيمن الزهرة تطالب
يا عليُ يا علي

ساعد الله الليلة قلبك
تعثر و ما تشوفه دربك
يا مصاب اللي يعذبك .. و انحنيت
يا علي و من غسّلتها
اشلون هالساعة عشتها
يا مصيبة اللي شفتها .. وانحنيت
ونت و يصعب وضعها
ميتة بس ينزل دمعها
لمن مر جفك ضلعها .. و انحنيت
للحزن قامت قيامة
هم شفت يا بو اليتامة
عالجفن ظلت علامة .. وانحنيت
ما تطيب .. و الضلع طق بصدرها
ما تطيب .. السطرة ما رايح أثرها
ماتطيب .. و ما يرد لحبابه غايب
يا عليُ يا علي

موقف و يدمي النواظر
بيه هضيمة و كسر خاطر
وانت رغم اليجري صابر .. عالمصاب
حسن و حسين بدمعهم
حضنوا بجثمان أمهم
يا حزنهم يا هضمهم .. بالمصاب
امن الجفن مدت ايديها
ونت وونوا عليها
و السمه سمعت بجيها .. بالمصاب
امن السمه صوت و علامة
يا علي بعد اليتامه
العرش و اهتز مقامه .. بالمصاب
يا حسين .. دمعتك عالباري تصعب
ياحسين .. و شيصبر الليلة زينب
يا حسين .. لليتامه الدمع صاحب
يا عليُ يا علي

الشمس بجفوفك تردها
انجوم كون الله تعدها
تعجز اتشيع جسدها .. من مشيت
موقف و يصعب يحيدر
ياللي قالع باب خيبر
بالنعش جدمك تعثّر .. من مشيت
يا ثقل بجفوفك أصعب
تتعب الدنيه و متتعب
لكن انت الليلة أعجب .. من مشيت
جبل خطواتك شفتها
فاطمه لمن شلتها
تنحني أجتافك عفتها .. من مشيت
يا غريب .. شّيعت كل ذكرياتك
ياغريب .. بالحزن ظلت حياتك
يا غريب .. و الحكم ربك تراقب
يا عليُ يا علي 

 

للشاعر : واثق العيساوي