اسد الله (مكتوبة) - باسم الكربلائي

 

 

أسَد الله او سيفي أسَدْ .. وانتي هَم تدرين
لو أسِل بتَّاري أبَـدْ .. ما يظل الدِّين
يالوديعه او كيفچ بَعـدْ .. گولي شِتْؤمرين
يالوديعه او كيفچ بَعـدْ .. گولي شِتْؤمرين

لو أسكِت قهَرْ لو أنهَضْ أمَرْ
قاسيت الأمَرَّيْن
سيفي ينتظر من عندچ أمُر
فِصْلي ابِّين اِلَمْرَيْن
ليَّه أشِّـري اختاري او قرّري
وحده منِّ اِلثنيْن
دين الله يِظَل لو يرجَع هُبَل
ابكيفچ يمِّ لحسين
هالأمُـر عالأمَّه اِشتِبَك .. ما تشوف النور
و هذا دين الله عالمَحَكْ .. والوضع مخطور
او هذا إسرافيل اسْتِعَد .. ينزل ابهالحِـيـن
يالوديعه او كيفچ بَعـدْ .. گولي شِتْؤمرين

أنا حيدره بيْميني تره
مَطْوَيَّه السماواتْ
كلشي ابْقَبْضِتي وبْچف راحِتي
تفترِّ المَجَرَّاتْ
لو ردتي أهِد حسبي كل فرِد
من تعداد الأموات
وأقسم لچ قسَم أكسر كِل صنَم
وامحي العُزَّه واللّات
إلچ أكْسِر راس العِـده .. صنميْـن النَّاس
أنا إبراهيم او غِـده .. ذو الفقاري الفاس
بس إذا غير الله اِنْعِبَد .. ما ظَـنِ اتْقِبْـلِين
يالوديعه او كيفچ بَعـدْ .. گولي شِتْؤمرين

يالزهره أمِس ردّيت الشّمِس
وابْسَبَّابِتي هَايْ
عطّلْتِ الفَلَك او جبريل المَلك
ربّيته اعله يمنايْ
ما حاجه الدَّعَه تنزل قارِعه
من أرمِش ابعينايْ
بالحومه چِنِت لو أهجِم رِدت
الله يهجِم اوْيايْ
أنا حُكْمي واجب فرُض .. أمْري كُنْ فيْكون
السّمه أطبگها عالأرض .. و افْني بيدي الكُون
ما أبَقّي مِنْهُـم اَحَد .. لوَن اِتْريـديـن
يالوديعه او كيفچ بَعـدْ .. گولي شِتْؤمرين

واگف سُور إلچ هذا منزلِچ
فِنَّه اليعتني لِيْه
او هذا آنه علي واليگرَبْ إلي
اُمَّه داعِيَه اعليْه
الما شايف بعَد سطرات الأسد
خلْ يجي اُوْ أرَاوِيْه
و السيفه حِمَل حسباله بطَل
حتّه اِسْمه أَنَسِّيْه
گلنه فاطِم گالوْا وإِنْ .. يَمْ حَسَـن والله
أنا لو بس عندي إِذِنْ .. أدري شحْچي اوْياه
ما أخلّي راس ابجسَد .. لو إلي اتأشْرِين
يالوديعه او كيفچ بَعـدْ .. گولي شِتْؤمرين

قتَّال العَرب بعيْـوني الغضَب
يمِّ الحسَن لو بانْ
ميْهمني الجمِع اوخلها تجتمِع
كل الإنس والجان
لاچن والفَلَقْ سيفي لو نِطَقْ
يسكِتْ صوت الآذان
اولو صدرچ شِفه دين المُصطفی
حِسْبِيهِ ابْخبر كانْ
هذا نَصْ قانون السِّمه .. او نِزْلَتِ الأحكام
تره لو ماكو فاطمه .. يعني ماكو اسْلام
الهالسبب لو شفتي الكمَد .. لازم اِتْصِبْرِين
يالوديعه او كيفچ بَعـدْ .. گولي شِتْؤمرين

بمْتوني جَبل شلته من الأزل
عهْد النّبي المختار
گلّي لو رحِت مهما شاهَدِت
إصبر يا حِمه الجار
فصَّلي الأمُر عن أهل الغدُر
لو هجموْا عله الدّار
خدّچ ينسطر او ضلعچ ينكسر
و ابصدر چالبسمار
الْنّبي سولَف كلشي إلي .. امْن الألِف للياءْ
تره جِدّامَك يَا عـلي .. تُضرب الزهراءْ
عندي منِّ الهادي عهَدْ .. حافِظه امْن اسنين
يالوديعه او كيفچ بَعـدْ .. گولي شِتْؤمرين

واشبيدي إذا فِي العَيْنِ قَذىٰ
واعله الصبر مجبور
ما ظلّي رَجَا او فِي الحَلْقِ شَجَىٰ
يبقه لْنفخة الصّور
لو أبْدِي العذر إلمن أعتذر
او تدرين إنّي معذور
من ضرْب المَتِن لو لطْم الجفِن
لو قـُرْط ِچالمَنثور
لو بدّيَّه چان الأمُر .. منهو يتدنّاچ
أنا أكسُر ما أنكسُر .. إي وحگ عيناچ
هذا حُكم الفرْد الصَّمَد .. وانتي شتشوفين
يالوديعه او كيفچ بَعـدْ .. گولي شِتْؤمرين

 

للشاعر : عادل أشكناني