أدعي يا زينب (مكتوبة) - باسم الكربلائي

 

 

ادعي يا زينب أمانة
الله يتقبل دعانه
يعوضنه بحنان و رقة و احساس
الأخذ محسن يزينب ينطي عباس

يزينب شيلي ايدچ للعلي العالي
انتي ادعي بمحمد و اني بالوالي
انا حسين عند رب العرش غالي
يزينب صفنت امي ضلت ابالي
يالحبيبة ايعوض الله
و ابدموعچ هالله هالله
نعم عدنه و تعرف الناس
الأخذ محسن يزينب ينطي عباس

يخوية بنار قلبي ربچ العالم
مثل نار الغضى بس الصبر لازم
رحل محسن يزينب و القمر قادم
ربچ هم يعوض فاطم بفاطم
زينب ليوم القيامة
من بعدها انضل يتامة
بچه حلم الطفولة و شيب الراس
الأخذ محسن يزينب ينطي عباس

چنت بالمسجد و حسيت بالكسرة
احس قلبي يگلي ماتت الزهرة
اجيت و چني طير و راجع الوكرة
وصلت الدار لن الباب مستعرة
احمر البسمار شفته
هذا دم امي عرفته
اذا اذكر ضلعها تضيگ الانفاس
الأخذ محسن يزينب ينطي عباس

گلت للمغتسل لازم اتابعها
شبگت امي لحد ما ونّت اسمعها
احس لسه اعلى خدي حر مدامعها
اجه الوالد يگلّي بسرعة ودعها
گتله امّي تريد ابنها
لفني يا بويه بچفنها
بچه حامي الحمية و گلي لا بأس
الأخذ محسن يزينب ينطي عبّاس

تعالي اوياي يم الباب نتعنه
نشاهد مصرع امنه و خلي نتمنه
انا اعليه الدموع و انتي ع الونه
نشوف اشلون طاح و مات محسنه
بالچ اتمسحين اثرها
بي تضل نفحت عطرها
يخويه وسفه حيدر حدّه ينداس

تعالي انگابل البسمــار ونحـاجيه
نگله اشلون صدر أم الحسن تاذيه
لون ادري بأذيته و المصيبه البيه
وحق عينچ يزينب ساعة ما خليه
رايده اليكسرلي عظمي
حتى احس بونت امي
و اصيح انظر ياألهي فعل الأرجاس
الأخذ محسن يزينب ينطي عباس

انا ويّاچ هالگعدة تضل ذگره
بعد گعده اشد من هاي يالحرّه
اودعچ و السيوف الجسمي منتظرة
كفيلچ ع النهر لا يمنه لا يسره
بيدچ اتقدميلي مهري
هم تقلبني اعلى صدري
وصيت امچ يزينب صدري ينباس
الأخذ محسن يزينب ينطي عباس

اطيح من المهر و الناس تجمع
يزينب جسمي هذا كله يتگطع
تشوفين اعلى صدري الشمر يتربع
تحشمين الكفيل افــزع و لا يفـزع
من يحز نحري يخويه
صيحي يا حيدر يا بويه
غريبه و الشماته اعليه حراس
الأخذ محسن يزينب ينطي عباس

للسيد : عبد الخالق المحنه