يا بو الأكبر (مكتوبة) - باسم الكربلائي

 

 

يا بو الأكبر نظل وفاية
واحنه كل عام نجي مشاية

إحنه والعباس ما نخلف وعد
مثل عهد الشاكري عدنا العهد
كلها فدوة تروح حتى البالمهد
بس رضاه و ما نريد أكثر بعد
أول حچایة و أخير حچاية
واحنه كل عام نجي مشاية

هاي خطوات المحب بالأربعين
هم ما يمشون بس المؤمنين
الشعاير هاي صارت إلنا دين
واحسيناً واحسيناً باليقين
أربع حروف معاني هواية
احنه كل عام نجي مشاية

نعوف كل شي إلا شخصك مانعوف
نوحد الرايات و نرص الصفوف
لو تعبنا من المشي نوصل زحوف
نصير للعباس زندين و چفوف
والله هيهات تطيح الراية
احنه كل عام نجي مشاية

احنه شنسوي ترا بحقك قليل
إي وحگ دمع السبي وجرح العليل
مثل ما زينب مشت درب الطويل
احنه نمشي ونمشي فوگ المستحيل
حب الحسين وسيلة و غاية
احنه كل عام نجي مشاية

احنه أول ما نشأنا بالحياة
شفنا حب حسين من المعجزات
الصلاة والصوم والحج والزكاة
والشفيع المنقذ بيوم الممات
والأحاسيس قرت هالآية
احنه كل عام نجي مشاية

أسهر الليل أنا وأشعاري
بس الحسين ملك أفكاري
يعجز الماي يطفي ناري
واشعر حسين يريد الجاري
هذا بوالماي تعذر مايه
احنه كل عام نجي مشاية

 

للشاعر : عقيل فرهود الكربلائي