يا هلا بالمشاية (مكتوبة) - باسم الكربلائي

بالعيون على الراس ..ياهلا بالمشايه
...
ثوره العشاق طلعت ..ربنا هو يعينها
اعلنت ساعه صفر ..اربعين احسينها
حسين ابو الأكبر تواصل هالغرام وبينها
فزعه للمظلوم راحت حتى توفي بدينها
ملايين ..موالين ..رايه تساعد رايه
...
بالعيون على الرأس ..ياهلا بالمشايه
..
حيرت كل العقول ومنهو مايتعجب
تعبت كل اﻷعادي وهيه ابد ماتتعب
تنصر الدين بمشيها ونصرتا للمذهب
تروح تتلقى العقيله تصيح آه يازينب
نواسيج ..نوافيج ..يم عون انتي الغايه
...
بالعيون على الرأس ..ياهلا بالمشايه
..
سفره معموره وكريمه وخير ربك كله
زاد الحسين شحلاته بيه شفاء العلة

من مضيف الحسن هذا والكرم يندله
توحدت كل المشاعر للكريم تقله
طبع بيك ..يخليك ..تكرم الضيف بهايه
...

بالعيون على الرأس ..ياهلا بالمشايه
..
والنعم من المواكب بالمحب تتبارك
تطلب من حسين بلكت بالاجر تتشارك
تكله ياروح الزجيه احسبنا من زوارك
كلنا عد عيناه يأمر من يجي خطارك
بالكلوب ..يمحبوب ..زوارك الوفايه
...

بالعيون على الرأس ..ياهلا بالمشايه
..
أربعين حسين وحد كل شتات الأمة
كل الاطياف على دربه بالعزم والهمه
كل الاعمار ونداها يقول يابو اليمه
هنا الطفل وهناك شايب والشباب تخدمه
عهد دام ..هاﻷعوام ..وحسين دق الثايه
....
بالعيون على الرأس ..ياهلا بالمشايه
..
والله رفعت راس بيكم والنعم من عندكم
مايفرقكم الحاقد والسبط يجمعكم
حاضر المهدي ويباصر هالمشي ويسمعكم
ياهلا وكواكم الله والقلب يوسعكم
ميامين ..محبين ..طول الدرب ويايه
...
بالعيون على الرأس ..ياهلا بالمشايه
..
كربلاء بيكم تفاخر ظلت المعموره
حسين ماينسه تعبكم عنده كل الصوره

كل جدم تسعى بطريقه عالتعب مشكوره
هاي خطوات الجنان وبالسند مذكورة
عشق صار ..والأحرار ..من اسمك مسمايه
....
بالعيون على الرأس ..ياهلا بالمشايه
..
للشاعر : عمار هليل الواسطي