يراحة بالي (مكتوبة) - باسم الكربلائي

 

 

يراحة بالي ... مكانج خالي
جمر بأنفاسي .. واحساسي كسروا ضلعها
يماي الكوثر صرت مو حيدر
يدور ابراسي .. واحساسي كسروا ضلعها

حبيبة روحي .. ضماد جروحي .. عليها شصاير من خوفي وجعني كلبي
ردت اوصلها .. وعليها اسألها .. تهت واجدامي تتعثر وشطوله دربي
وصلت لبيتي .. شفت عافيتي .. شمس مجروحه وتناطر اعليه تربي
بجن ويايه .. حجاب وآية .. كلت ع الظالم والطاغي اشهد يربي

إذا مر بيها .. الهوه يأذيها .. اشيصير بحالي
واحساسي كسروا ضلعها

ترافة ورده . عطر مابعده . شنو اليجرالي
واحساسي كسروا ضلعها

يراحة بالي ... مكانج خالي
جمر بأنفاسي .. واحساسي كسروا ضلعها
يماي الكوثر صرت مو حيدر
يدور ابراسي .. واحساسي كسروا ضلعها

بقت تشكيلي .. واعاتب ليلي .. ولا جن يسمع تعبني وماجاني صبحه
رهيبه الحاله .. الحبيبه كباله .. يشوفه يعاني ومايكدر ايداوي جرحه
أثر يم بابي .. لأعز احبابي .. دمع ومعاتب وآثار لأيادي وكحه
وحق دمعتها .. وحرج عصرتها .. الوعد خلاني الآذاها ماروح اذبحه

وحق العالي .. وصية الغالي .. شلتها ابعيني
واحساسي كسروا ضلعها

نطيت احجايه .. حفظت الغايه .. وفيت لديني
واحساسي كسروا ضلعها

يراحة بالي ... مكانج خالي
جمر بأنفاسي .. واحساسي كسروا ضلعها
يماي الكوثر صرت مو حيدر
يدور ابراسي .. واحساسي كسروا ضلعها

يجرحي الثاني .. خفيت احزاني .. كتمت اهمومي وفاضحني دمعي اعله رمشي
كسر بجناحي .. بعيده افراحي .. العمر من دونج ياروحي جابولي نعشي
حمل ساعاتي .. بثكل آهاتي .. زماني الواكف لعيونج مايرضه يمشي
شنو الباقيلي .. يشمعة ليلي .. يعمري الرايح والآتي وجنتيلي كل شي

عجيبه احلامي .. وهذيج ايامي .. يصيرن ماضي
واحساسي كسروا ضلعها

دعيت الباري .. يبرد ناري .. الحكم والقاضي
واحساسي كسروا ضلعها

يراحة بالي ... مكانج خالي
جمر بأنفاسي .. واحساسي كسروا ضلعها
يماي الكوثر صرت مو حيدر
يدور ابراسي .. واحساسي كسروا ضلعها

اميرة روحي .. ضماد جروحي .. واعز ماعندي ودلالي واعليها خايف
ملاك اسنيني .. واعز من عيني .. حجيها الدافي يتعثر بين الشفايف
بدت تبجيلي .. دمع تحجيلي .. عذاب الفركه والعشره صارت سوالف
ملكت اعصابي .. حسبت احسابي .. اضم ادموعي وبعيوني ماجني شايف

دمعتي انهارت .. جهنم صارت .. نقذ كل صبري
واحساسي كسروا ضلعها

صحت ياساتر .. خفت من باجر .. نهاية عمري
واحساسي كسروا ضلعها

يراحة بالي ... مكانج خالي
جمر بأنفاسي .. وحساسي كسروا ضلعها
يماي الكوثر صرت مو حيدر
يدور ابراسي .. وحساسي كسروا ضلعها

اغسل بيها .. واخاف اجويها .. دموعي الطاحت من عيني تحرك جهنم
لزمت الكسره .. شبجت العشره .. جبل لوشايف هالحاله يمكن تهشم
اليغسل بيده .. فرحته وعيده .. تضيع آماله وسنينه
وعمره يتهدم
ردت بجفوني .. اجفن اعيوني .. والفها ابروحي وبصدري جرحها يلتم

وطن جانت لي .. جرح عافت لي .. طفت حنيتي
واحساسي كسروا ضلعها

شريكة همي .. واحسها بدمي .. نبض عافيتي
واحساسي كسروا ضلعها

يراحة بالي ... مكانج خالي
جمر بأنفاسي .. واحساسي كسروا ضلعها
يماي الكوثر صرت مو حيدر
يدور ابراسي .. واحساسي كسروا ضلعها

شمس وانباكت .. وروحي اشتاكت .. واحس نبضاتي ابشرياني عني غريبه
التسد العازه .. شلتها اجنازه .. دفنت ابإيدي غاليتي دنيه عجيبه
المشاهد تجرح .. زمن مايسمح .. اسوي صدري وبضلوعي كبر الحبيبه
طويل افراكي .. جبيره اشواكي .. كأني بزينب من هسه صارت سليبه

الحسن بجروحه .. يوادع روحه .. كسرلي الخاطر
واحساسي كسروا ضلعها

واشوف احسيني .. يتيم ابعيني .. على امه يناظر
واحساسي كسروا ضلعها

يراحة بالي ... مكانج خالي
جمر بأنفاسي .. واحساسي كسروا ضلعها
يماي الكوثر صرت مو حيدر
يدور ابراسي .. واحساسي كسروا ضلعها

ي كل احبابي .. طويت اكتابي .. دعيت الباري ينسيني واحاول انسه
جبيره اوجاعي .. كسر بشراعي .. سفينة وتاهت وبظلمه وما الها مرسه
اشوف القادم .. زمان الظالم .. كأن طف ولدي وحتوفه بدوها هسه
اشوف الخاين .. علينه يعاين .. يعد اجيوشه وخيوله والدنيه خرسه

يزيد وحزبه ..و شرارة حربه .. بدت هجماته
واحساسي كسروا ضلعها

الغدر بالزهره .. على ابني وصدره .. اثر لمساته
واحساسي كسروا ضلعها

يراحة بالي ... مكانج خالي
جمر بأنفاسي .. واحساسي كسروا ضلعها
يماي الكوثر صرت مو حيدر
يدور ابراسي .. واحساسي كسروا ضلعها

 

للشاعر : احمد الذهبي