ها يا مهدي - فيديو (مكتوبة) - باسم الكربلائي

 

 

هايمهدي اشلونك ابشهر المحرّم
هايمهدي تِجري عينك دمعه لو دم
هايمهدي اِبحالِتك اللهُ أعلم هايمهدي

غايب اِنته اْو حاضِره بيك الفَجيعه
مو مدامع جثث بعيونك صَريعه
إجه شهر المات ظامي اعله الشِريعه
اْو تِدوِي بِذنك (الله ياحامي الشَريعه)
وابهِلاله هالشهر يطعن شعورك
وابهِلاله تِـدعي يتعجّل ظهورك
وابهِلاله يابَشَر مثلك تألّم ها يمهدي

يامَن اجهنّم غِدَت تحلِف ابنارك
وين ماتمشي الحزِن يمشي ابجوارك
مِعصب اْو رايه اْو عِمامه اْو ذوالفقارك
كلها صارت تِستِفِزّك يمته ثارك
ابهالليالي حالك اَشبَه بالثَواكِل
ابهالليالي چَنّك اتشوف الـمَقاتِل
ابهالليالي هم تِشِم حرگ المخيَّم هايمهدي

وين تطبيرك يمهدي ابيوم عاشِر
"أبِرضوى أمْ طِوى" تِحيي الشعائر
ابكربله قطعاً وَلاشك إنته حاضِر
اْو تِركض اطويريج حافي ابراس حاسِر
هالله هالله اتصيح وين احسين وينه
هالله هالله بالسيوف امگطّعينه
هالله هالله يمته يومك يكشف الهَم ..

ليش نبضك يضطِرِب والحاله صعبه
سهم الِـ اِمثلّث ابگلبك لُو اِبگلبه
اْو عالنحر مو عالصدر تلطم ابرهبه
مِن يمُر طاري الشمر واثنعش ضربه
ابهالمصيبه تِحس چن اِبرجله داسك
ابهالمصيبه فُصل يَم احسين راسك
ابهالمصيبه صدره لو صدرك تهشّم

اِمحرّم ايطلبك دموع اِلكل مُصيبه
اْو مايخَلْص اِلا اْو صفَر رايد نصيبه
ايگول اَريد المهدي يبچي اْو يِشِگ جيبه
عاللّي تنعي: امنين ابوفاضل أجيبه
راعي غيره والسبي اِلگلبك يحرگه
راعي غيره تبچي لجل امتون زَرگه
راعي غيره اْو بالبچي عمرك وصل چم

 

للشاعر : علي السقاي