طاحت الخيمة (مكتوبة) - باسم الكربلائي

 

 

طاحت الخيمة الجبيره
سافر العشنه اعله خيره
خلة افراكه اشيسدهه
والدي وماعندي غيره

لو راح الأبو بيمن اسلي النفس
وبموت السمه لا بد تموت الشمس
ناعور الجفن مايفرغ من الدمع
بفراكه صفه ماينجفي ينترس

الفاجد ناظر بيمن يشوف الضوه
الكطعو ريته بيمن يجر الهوه
لكل عله دوه تترهم اعله الجرح
وجروح القلب مايرهم الهن دوه

وانا ياليل الاباته .. وراح المدلل بناته
جروحي عكبه من يشدهه .. وجهي المن راح اديره

الماعنده ابو شله ابحياته بعد
ومجانه الخلي خالي يضل للأبد
راح وصورته بكل زاويه وكل كتر
هنا صلى ودعى هنا كام وهنا كعد

نايم والدي وهالليله نومه اختلف
نايم بالكبر جن نومة اهل الكهف
شبيدي اعله المشه لوكتله رد مايرد
عايف منزله واختار وادي النجف

بويه ياماي وتبده .. النايم ابكبره اشيرده !
جثتك اليحفر لحدهه .. جنه دافن له عشيره

راح المنحسب بيرغ هلي واخوتي
خلف اجنازته بح صوتي من نخوتي
ريضو بالنعش ياشايلين النعش
نزلوا اعمامته البيهه انطوت عزوتي

نوب اصرخ كمت يل بالجنازة انشلت
من كد البجي يا ابالحسن وشلت
دفنو هيبتي يوم ادفنوك ابلحد
شالت فرحني يوم الي عني شلت

ياسدر عشنه اعله فيه .. ما اني بنتك رد عليه
ياولي الما والي عدهه .. يامجير المستجيره

خلاني ومشه وضليت انا ابعازته
وانظر فاطمه تلطم وره جنازته
سواهم بشر وشكد عليهم تعب
تالي امته بسيف الغدر جازته

طبرو هامته المتروسه غيره ووفه
خضبو شيبته لو شيبة المصطفى
لوجانو زلم لاكوه وجه ابوجه
مو وكت الفرض ويجونه من الكفه

لو صدك عدهم رجوله .. بالمعارك جان اجوله
والشطر عمرو ابن ودهه .. بالحرب ماصح نضيره

صرت من الحزن ماخذه طبع الشمع
بالليل احترك وايامي تخلص دمع
جرحك ياعلي فززلي جرح الغفه
سيف الصوبك هيجلي كسر الضلع

عكب ام الحسن جلجل عليه اليتم
وبسمعي بقه طكة ضلع ينهشم
وانا ابهل وضع وبحزني عل والدة
لن الصايحه راس الولي منحسم

بالصلا بالسجده الاوله .. يوكع العرش اعله طوله
سجدته لمن سجدتهه .. سافر الوالي المصيره

جبير العايله محد يسد خلته
ودعني وترك وسط الجبد علته
نوحي ومهجتي متوالمين اشكثر
عشره من الزغر لاملها لا ملته

بآذان الفجر أحا ياذان الفجر
كلما يرتفع انظر علي منطبر
ينطر القلب كلما يطر الصبح
روحي تنفطر من يلفي عيد الفطر

زيدي ياحسراتي زيدي .. وانا ماهو هلال عيدي
وحشته ياهو اليردهه .. حيرة الملهوفه حيره

طاحت خيمني الخيمة الجبيره علي
ويهون الأمر عدلين يمي هلي
لجن همضمتي ياهضمتي ابكربله
وحدي من اضل ياهو الي يفزع الي

عندي سبع طعش خيمة تحف بالخدر
كل خوفي إذا صار امري بيد الشمر
بيمن التجي وخواني فوك الثره
وانا اعله الهزل واكطع درب لليسر

من عكب ذيج المهابه .. تالي كعدونه ابخرابه

الحره لوضلت وحدهه .. مو عجب تصبح يسيره

 

للشاعر: الميرزا عادل اشكناني