دمعتج بنتي رقية (مكتوبة) - باسم الكربلائي

 

 

دمعتچ بنتي رقية
غالية كلش عليّه
عندنا موعد هالمسية

أدري تنتظريني أرجع حايرة بظنونچ
وآني من عاشر محرم فارگتها عيونچ
لكن وداعة غلاتچ أدري زرگة متونچ
عالرمح راسي وشوفچ للغرب يسبونچ
راح أشوفچ بالسلامة
والحلم أول علامة
نلتقي الليلة سوية
عندنا موعد هالمسية

آني بالطف سلبوني و زاد همي عليه
ساعة الحرگو خيمنا و جثتي مرمية
حتى من ضربوچ چنها كل ضربتچ بیه
والگطع من چفي خنصر يگطع الترچية
بوية وبختمة حياتچ
راح أحقق أمنياتچ
لا يتيمة ولا سبية
عدنا موعد هالمسيه

راسي من فوگ العوالي يساير الممشاكم
إنتي وعيالي سباية روحي كلها وياكم
شفت بعيوني الشماتة شلون تتلگاكم
واليسبكم والضربكم بالسبي واذاكم
هالمشاهد شاهدتها
آني گوة تحملتها
عالرمح شيصح بيديه
عدنه موعد هالمسيه

عمتچ زينب غريبة بالسبي عذريها
ما رضت عني تخبرچ روحچ تأذيها
تحملت زينب مآسي الله يدري شبيها
صعبة من بعد أبوفاضل هالعداء تسبيها
لمن تسأليها عني
قبل ونچ يبدي وني
أنا گلتلها الوصية
عندنا موعد هالمسية

يارقية خطوة خطوة وياچ يا مَي عيني
تنزل الدمعة على رمحي لمن تذكريني
بالحلم خطار إجيتچ أدري تتلگيني
هواية ملهوفة يبوية وصعبة ما تنسيني
هذا آخر حلم بنتي
لو حچيتي ولو سكتّي
هالمساء ترجعين إليه
عندنا موعد هالمسية

يا شبيهة أمي فاطم خلي گلبچ صابر
من بعد هالليلة عقلچ بعد مَيْظل حاير
نرجع و يلتم شملنا وينجبر كل خاطر
هاي آخر ليلة بنتي وقبل جية باچر
هملي هالليلة و حزنها
الدنيا لا تطلبين منها
ليلتچ ليلة منية
عندنا موعد هالمسية

بنتي يا سباح گلبي يا نبض شرياني
لحظة ما عفتچ تراني ساكنة بوجداني
بالخرابة آخر مسية و راح مر لچ آني
هالأمر مكتوب حتماً و الأمر رباني
چنت أسمع كل ونينچ
كل دعائچ كل حنينچ
يالتشبهين الزچیة
عدنا موعد هالمسية

كسير وسلوتي بوّني لونّك
يمهدي بالسبي حاضر لوّنك
تشاهد عالنحر ماتت رقية

أون ومن ونيني الأرض ماجيت
ودموعي بفرقتك يحسين ماجيت
يبويه بالخرابه ليش ماجيت
تعال بجيتك تصير المِنيه

 

للشاعر : عمار هليل الواسطي