يغالي (مكتوبة) - باسم الكربلائي

 

 

يغالي وصيتك
أنفذها وحق لحظة سكوتك
يشيلون الجنازة بس أخوتك
يغالي يغالي

أخوتك هالجنازة يحملوها
على اطراف الأصابع يرفعوها
الجنازة بلا أخو من يدفنوها
أحس چنها يتيمة تريد أبوها
يوالي شبگالي
أكو غيبة أخو قلبي تفسره
وأكو وگعة أخو ظهري تكسره
شبگالي شبگالي

أنا أتقدم الموكب بالبداية
وعلى نعشك أبوفاضل حماية
إذا رادوا حرب إحنه المناية
ولا أهتم وأخو زينب وراية
غوالي يحالي
صدگ خوية الأخوة إلها عازة
على چفوف الأخو حلوة الجنازة
غوالي غوالي

أوسدك عاللحد و إيدي على خدي
لچن إسمح أسولف لك العندي
منو باچر يجيني يحفر لحدي
ثلاثة أيام أضل عالغبرة وحدي
سؤالي على بالي
أضل بلا غسل وبلاية تچفين
أخوتي مذبحة و اهلي بعيدين
سؤالي سؤالي

أهيل ترابك الغالي بيدية
و اسويلك مآتم هاشمية
ولا مثلي تدوسك خيل أمية
ولا راسي برمح واختك سبية
وصالي عيالي
يسمعن من بعد كسرة عظامي
أخوك الينذبح عالشاطي ضامي
عيالي عيالي

وصيتك عالإبن أعرفها كلفة
يگر عينك القاسم أنا أعرفه
أنا بسبعين ألف خيالة ازفه
أطمنك من وريده نحني چفه
حلالي رسالي
أشوفه من يسل سيفه وينازل
شبيهك بالوغى ومثلك يقاتل
رسالي رسالي

أخوتك خمسة يم گبرك ينوحون
أنا أخوان أربعة گبلي يموتون
وسف واحد بعد واحد يروحون
أضل وحدي أنادي وما يفزعون
صفالي خيالي
أنا أتمنى تجي ومحمد وياك
يصير بيسرتك و انا اعله يمناك
خيالي خيالي

عدل ميت أصيحن يا خسارة
تظل بحسرة اليوصل زيارة
ذهب گبري أنا و گبرك إشارة
حلم عندي أشوفن لك منارة
تلالي يعالي
تجيك الزهراء أمنا و عدها شمعة
على گبرك توجها و تبقى تنعى
يعالي يعالي

يجي يوم و تجيك الرافضية
مشي يبدون من الغاضرية
مواكب حسنية و حسينية
تهوس والبيارق مهدوية
إعتنالي موالي
أنا أتمنى أشوف الگاصدينك
مثل يوم أربعيني أربعينك
موالي موالي

 

للشاعر : سيد عبدالخالق المحنة