اقطع الكلام (مكتوبة) - باسم الكربلائي

 

 

اقطع الكلام **سيفي يتكلم واريد الكل يسمعه
صولة الختام **لو جبل باب الشريعه اليوم اقلعه
هاذي خيبر **وآني حيدر

قل هو الله احد أبدأ كلامي
واشهرت سورة براءه مو حسامي
مصحف او كعبه او محمد في خيامي
وآني حيدر وابرهه او مرحب امامي
فيل او لا حجر **باب او لا نهر
هذا المختصر**من ينازل
صاحت الطفوف **هيه كلمه الزينب او مابيها رجعه
بلغ الالوف **گلهم العباس قادم من يمنعه
كلشي اگدر **وآني حيدر

اقطع الكلام **سيفي يتكلم واريد الكل يسمعه
صولة الختام **لو جبل باب الشريعه اليوم اقلعه
هاذي خيبر **وآني حيدر

في بدر ناده المنادي عالبريه
لافتى إلا حامي الحميه
او هذا الندا من زينب اتكرر اليه
لا فتى إلا انا بالغاضريه
حيدر هل اته **غيره لا فته
واسمع نخوته **يابو فاضل
دمدم الاله **يالله ياخير فتى بعد الصميده
يا شايل لواه **اهجم عليهم غضنفر عالطريره
خلها تصفر **وآني حيدر

اقطع الكلام **سيفي يتكلم واريد الكل يسمعه
صولة الختام **لو جبل باب الشريعه اليوم اقلعه
هاذي خيبر **وآني حيدر

يا علي او راية احد صارت نشيدك
والتلوگ الايدك اتلوگ اعله ايدي
آني شايلها تره او يشهد عضيدي
لو وگع چفي اركزها ابوريدي
رايته ستر **ما تنزل شبر
بيدي تستقر **چف مراجل
جمع الرجال **بلكي من يكثر عددهم يملي عيني
وادري بالمحال **ترعب السبعين الف فارس حسيني
موت الاحمر **وآني حيدر

اقطع الكلام **سيفي يتكلم واريد الكل يسمعه
صولة الختام **لو جبل باب الشريعه اليوم اقلعه
هاذي خيبر **وآني حيدر

ترتجز بالخندق او كلك معاجز
من ضربة وذكرها عند الهزاهز
وآني مثلك ارتجز لمن ابارز
آني اخو زينب ورجعهم جنايز
الگطهم لگط **وعيونك شرط
بالنص بالضبط **وآني قائل
والرفع سماه **الا هالسبعين الف اقطع خبرهم
والعلي او علاه **ما اخليهم ولا اخلي اثرهم
سيفي قرر **وآني حيدر

اقطع الكلام **سيفي يتكلم واريد الكل يسمعه
صولة الختام **لو جبل باب الشريعه اليوم اقلعه
هاذي خيبر **وآني حيدر

والدي يوم الفتح كسر صنمهم
وآني ابنه او عالنهر اكسر خشمهم
آني امي فاطمه او معروفه امهم
او صارت ابكيفي اطشرهم والمهم
والامي القرأ **أفعل ما اشأ
اكتب هالنبأ **هذا عاجل
امر الامير **اسجدوا والماسجد ما يلگله راسه
ساعة النفير **والشمر لا يختفي خلف الحراسه
خله يظهر **وآني حيدر

اقطع الكلام **سيفي يتكلم واريد الكل يسمعه
صولة الختام **لو جبل باب الشريعه اليوم اقلعه
هاذي خيبر **وآني حيدر

هذه مو رايه تره زينب ابچفي
والهوه ايحاذر اذا مر اعله انفي
الا اشيل المشرعه كلها اعله چتفي
للخيم واسأل سكينه هذا يكفي
لو گالت نعم **اي كافي يعم
رشي عالخيم **والمحــــــــامل
ما صرت كفيل **لو تزاعلني سكينه هالحبيبه
والله والخليل **لو جبل يذبل تريده هم اجيبه
بيدي تصغر **وآني حيدر

اقطع الكلام **سيفي يتكلم واريد الكل يسمعه
صولة الختام **لو جبل باب الشريعه اليوم اقلعه
هاذي خيبر **وآني حيدر

من اجه احسين او وضع ايده اعله متني
چنت افور او ايده اخويه بردتني
صرت احس الرايه كلش تعبتني
بين اعليه التعب والخيل اجتني
ضل عندي الاهم **جودي والعلم
نادتني الخيم **وآنه احاول
نظرة اعتذار **عمه العفو هذا نصيبي
والقلع جدار **لوله ايد احسين ما يبرد لهيبي
سيد الكر **وآني حيدر

اقطع الكلام **سيفي يتكلم واريد الكل يسمعه
صولة الختام **لو جبل باب الشريعه اليوم اقلعه
هاذي خيبر **وآني حيدر

يا علي سامحني خاف امقصر آنه
عالنهر راح اترك اچفوفي او لوانه
وبظهور المنتظر صاحب زمانه
گله تاركلك ابو فاضل امانه
من ايد الگمر **ليد المنتظر
يا ثار النحر **والثواكل
ساعة الظهور **بيده يرفعها او ينادي واحسيناه
فارس او غيور **گله عطشان الرضيع او مارويناه
خله يثأر **وآني حيدر

اقطع الكلام **سيفي يتكلم واريد الكل يسمعه
صولة الختام **لو جبل باب الشريعه اليوم اقلعه
هاذي خيبر **وآني حيدر

للشاعر: سيد عبد الخالق المحنه