مشتاقه لك (مكتوبة) - باسم الكربلائي

 

 

مشتاقة لك يالغالي لكن رمحهم عالي

ماريد اسولف عالمتن .. لا عن زراگه ودمه
الحبل واصل للعظم .. واتخيل انته اللچمه
طاحت رقية من الخدر .. عالكاع مثل النجمه
ماادري المن التفت .. شو كلها تصرخ عمه
نسوني حمل متوني .. ايتامك ينشدوني
شافوا الراس اگبالي .. لكن رمحهم عالي

مشتاقة لك يالغالي لكن رمحهم عالي

گطعلي گلبي بهالسفر .. خلاني اجرن حسرات
بنص بناتك نومتك .. مو عالرمح خويه تبات
كلشي ومعزتك بالسبي .. حتى الهوه بي لچمات
شنهي بغيابك ماذبل .. ياورد عگبك مامات
كون العباية تشوفها .. كعبه وسياط تطوفها
ردت اشكي يمك حالي .. لكن رمحهم عالي

مشتاقة لك يالغالي لكن رمحهم عالي

مشاقه اشمك يالنفس .. روحي اشدها بروحك
نحرك نزف دم وضوه .. من عنده اسمع نوحك
ردت امسح بچف الدمه .. عالي الرمح مالوحك
لو ماترتل بالسمه .. ماعرفك امن جروحك
معقوله انته حسيني ! گمت انا اچذب عيني
ماعرفك اول تالي ! .. لكن رمحهم عالي

مشتاقة لك يالغالي لكن رمحهم عالي

تدري انته لوغاب الأخو .. تبقه الأخت تدعيله
وگبالي راسك عالرمح .. ويغمض من اشكيله
ياخويه من كثر الدمع .. بللت حتى الشيله
للگاع مو تدري المطر .. يوصلها بآخر حيله
تلاگينه نظره ودمعه .. واركضت نار ابشمعه
وجهك ضوه تراوالي .. لكن رمحهم عالي

مشتاقة لك يالغالي لكن رمحهم عالي

متعوده اشوفك يالندى .. تنزل على عيوني الصبح
لوگايل يدور الوكت .. واعليچ اسلم امن الرمح
مر الهوه بوجهك طعن .. وشما يمر يلچم جرح
راسك مثل غيمه مشت .. عين الضعن مثل الفلح
من تجزي يقرب موتي .. ماوصل يمك صوتي
تسمع انا حسبالي .. لكن رمحهم عالي

مشتاقة لك يالغالي لكن رمحهم عالي

طفلة من اطفالك شفت .. تبچي وتأشر عالمتن
وتگلي عمه شاهدي .. تراب شكثر فوگ الجفن
شگد احضنه حاولت .. بس الرمح ماينحضن
گلتلها كافي من الدمع .. بعيونچ محليه الحزن
تركض الراسك خايفه .. ترجعلي مدري اشايفه!
الحضنك تريد الخالي .. لكن رمحهم عالي

مشتاقة لك يالغالي لكن رمحهم عالي

كلما اطب ديره انشتم .. يمبخر بريحة علي
عرش الله ماتدري انكتب .. هالناس اساميهم هلي
وشما كثر بيه التعب .. كل هم براسك ينجلي
كلما يهزني الشوگ الك .. عطرك اشمه بمحملي
تجرحني تدري حچايه .. شتموا بيه هوايه
فزعت حتى خيالي .. لكن رمحهم عالي

مشتاقة لك يالغالي لكن رمحهم عالي

للشاعر : حسين الحبتري