ريت السافر يعود (مكتوبة) - باسم الكربلائي

 

 

ريت السافر إيعود * ماجرحت الخدود
يوم الودع وراح * صرت امن الحزن عود

جيت من الوداع وها ريت اعيوني عميات
مره ابخوفي اعثر واطيح ومره بالدمعات
درب الماخذك حته الهوه حسيت بي مات
تدري اشكد خذت من عمري يابويه هاللحظات

لوميته ولا جيت * آه ياوحشة البيت

بعدك جم جرح صاح * صرت من الحزن عود

كل ليله التمر عبدالله جني الصوته أسمع
اوكع واركض وجفيني كوه البابي تدفع
تدري ابغيبتك ببنيتك كل مرض يطمع
وبحسره ودمع لفراشي يا محبوبي أرجع

بس حيطاني يمي * محد يحجي بإسمي

ظلت بس الأشباح * صرت من الحزن عود

ناسيته المرض وي مارحت بس علتي أنته
لحظة خطوتك من باعدت حل موتي سكته
من عندي الذنب من صافحت جفك اوعفته
بس لو عاودت متسافر إلا و أني ميته

أدري اعتابي أذاه * لو ماخذني وياه

ليش ابدمعي يرتاح * صرت من الحزن عود

ماريد الهوه شهكاتي بي ياوالدي اتزيد
وانه الموت اريده وغيره لا صدكني ماريد
عمري ابلا كمر وابلايه عبدالله ولا ايفيد
دنيه وبس مصايب والدموع اوصفكت الإيد

كل لحظه ابإسمهم * انده واركض الهم

راحوا والدرب ناح * صرت من الحزن عود

دوم من الشمس لو حل صبح انخاها ترحل
واعرف هالشمس يحسين الك وين انته تندل
من اشتاك الك وابصدري ميظل هوه تقبل
راح وياج ادز صوره ألي بس خوفي يزعل

مايعرفني لو شاف * وجهي من الدمع جاف

بُعده يكسر اجناح * صرت من الحزن عود

صدرك بويه ذاكه الدافي خوفي ابخيل ينداس
وصفوا كربله وناس النوت حربك ولا ناس
فكري اتزاحم ابصورة عطش وجفوف عباس
وأعرف حالي زين وعمري ما وهمني الإحساس

خوف البيه مجنون * يارب مايشوفون

شر وياخذ أرواح * صرت من الحزن عود

معقوله انجرح وإحساسك أعرف بيه يدري
أعجب بويه خوفي وانته نحرك دمه يجري
هم إحساسي فز يارب دخيلك شنهو يجري
ليش ابجفي احس أصبع وكع وأنسحك صدري

حزن العندي ميغيب * جرح البيه ميطيب

جرحه ابلايه جراح * صرت من الحزن عود

 

للشاعر : علي درجال