يمته سيفك (مكتوبة) - باسم الكربلائي

 

 

يَمْتَه سِيفَكْ يِجْزَعِ اِمْنِ اگرَابَه
زِمْ لِوَاك اِوْ يومَك اِبْدِي احْسَابَه

يَمْتَه شَمْسَكْ تِضْوِيْ دِيجُورِ الزَّمَنْ
يَمْتَه تِسْرِجْ مُهْرَه وِ اتْشِدِّ الرِّسَنْ
عَجَّلَ الله فَرَجَكْ يَبْنِ الحَسَنْ
الدِّنْيَه غَابَه وِ اِنْتَه لِيثِ الغَابَه

الدِّنْيَه غَابَه اِوْ بَشَرْ بِالبَاطِلْ گِضَتْ
ادْيَارْكُمْ يَبْنِ الأمَاجِدْ گوِّضَتْ
قِلَّه أنْصَارَكِ العَالحَقْ حَافُظَتْ
غَرْبِل اِوْ شُوفِ اشْكِثُرْ چَذَّابَه

غَرْبِل اِوْ شُوفِ البَشَرْ بَسْ طَبْعَه ذِيبْ
نِعْمَه لو بِالألِف تِلْگالَكْ صِحِيبْ
يَاغَرِيبِ الدَّارْ دِينَ الله غَرِيبْ
گُوم وِ اِحْمِي الدِّين وِ اِحْمِي اكْتَابَه

گُوم وِ اِحْمِي الدِّينْ يَبْنِ المُصْطَفَه
يَالعَلَه چَفَّه ايْتِنومَسْ مُرْهَفَه
بَعْدَه جَمْرِ البَابْ لَاهِبْ مَا طُفَه
اِوْ بَعْدَه مِحْسِنْ سِيلْ دَمَّه اخْضَابَه

بَعْدَه مِحْسِنْ بِيكْ يِنْخَه اِوْ يِسْتِغِيثْ
الزَّهْرَه عِطْشَتْ ثَار وِ ابْسِيفَكِ الغيثْ
گُوم حورِبْ وِ انْتَه وَسْطِ الحومَه لِيثْ
عِنْدَكِ اوْيَه اهْلِ الضَّغِينَه اطْلَابَه

زِمْ لِوَاكْ اِوْ صُول يَبْنِ العَسْچَرِيْ
بِالمَدِينَه اِوْ صِيحْ يَالزَّهْرَه اِبْشِرِيْ
رُوحْ لِلطَّفْ وِ اُمْرُرِ ابْگاعِ الغَرِيْ
لَسَّه ابُو الأكْبَرْ سِلِيبَه اثْيَابَه

لَسَّه ابُو الأكْبَرْ يِنِدْبَكْ يَانَفِلْ
گُومْ وِ اِسْحَبْ مِنْ وَسَطْ گلْبَه النَّبِلْ
تِلْگه فوگ الصَّدِرْ عَبْدَالله الطِّفِلْ
آه يَحْسينْ اِوْ يَثُگلِ امْصَابَه

 

للشاعر : كرار حيدر الخفاجي