دنيا (مكتوبة) - باسم الكربلائي

 

 

دنيه... ما بيها بس هم و غدر ... دنيه
و إمنين أجيب إلها صبر... دنيه
راوتني نجمات الظهر ... دنيه

ليلة إوداعك ثواني إبسرعه مرت جانت أسرع من دمعتي
لحظة إفراگك مسافه إبلا نهايه إهوايه أطول من حسرتي
و العمر بالفرگه يطول يمته يخلص حته أخلص من غربتي
دهري... راواني أنواع الألم ... دهري
كل لحظه يرميني إبسهم ... دهري
و أعرف نهاية هالعمر ... دنيه

يبني كل الراح يرجع تدري يوسف رد قميصه للبشاره
و آنا كلكم مره ضيعتكم مره وحده ما إجيتوا يالغياره
يبني وين ألگه قميصك حته أشمه بلكي گلبي تطفه ناره
وينك ... يالتارك إبگلبي رمح ... وينك
لو أنسه يسألني الجرح ... وينك
خلتني للموت أنتظر ... دنيه

تدري أول كلمه أگلك من أشوفك يا حبيبي أحله كلمه
تدري آخر حلم عمري الما تحقق وينه نحرك أرد أشمه
تدري أجمل كلمه عندي شنهي يبني من صحت لي ها ييمه
يمه... معقوله ما ترجع بعد ... يمه
أم البنين إبلا ولد... يمه
ذابحني يا سيف الهجر دنيه

يشهد الله ما نسيتك لحظه وحده و إنت دومك إعله بالي
من كثر ما بإسمك ألهج صر أشكن إنت يمي مو خيالي
أنجوي إبنارك و أنادي إگرب إگرب يالعفتني هذا حالي
يبني... أتطشر إجروح و صحت ... يبني
أبجي و على وجهي طحت... يبني
بعدك و لا واحد يمر... دنيه

تاكل إبروحي الليالي و أشتكي لك يمه إرجع وينك إنت
و أرسم إهمومي إبطريقك مره أكتب بس تعالوا مره يمته
يالطريقك بيه يشعر من أسأله ما يجاوب يبجي سكته
إرجع... يالماخذ إوياك الشمس... إرجع
يا باجر و حلم الأمس... إرجع
مجبوره أقبل أي عذر ... دنيه

آنا أدري ما ترد لي بس أحاول ما أصدگ فارگتني
تالي بن حذلم إجاني و گتله جاوب إبني وينه عذبتني
ظل يعدد لي إبنيني فكري يمك إنت وحدك حيرتني
نوحي... إبنج صريع إبكربله ... نوحي
مسبيه كل العايله... نوحي
و الشده زينب باليسر... دنيه

أنتظر زينب تعاود و أمشي ليها لازم أسأل عن أخوها
عن گمر هاشم سؤالي و الكفلها يبگه ساكت من سبوها
إبني بس غيره و حميه وش يصبره يمه زينب سلبوها
إختك ... گتلك أمانه إبرگبتك... إختك
گلبي يگلي عذرتك... إختك
عند زينب إعتاب إشكثر ... دنيه

 

للشاعر: السيد عبدالخالق المحنه