ما خاب اليقصدك (مكتوبة) - باسم الكربلائي

لطمية ما خاب اليقصدك مكتوبة

 

الرادود باسم الكربلائي

 

 

ماخاب اليگصدك .. والحاجات عندك
ياموسى ابن جعفر .. ياموسى ابن جعفر

كلمن زادت اهمومه وقسى وياه زمانه
بس يوصل حضرتك كلبك ايضمه بحنانه
ياخذ طلبته من كبل لاينطق لسانه
اتكله ابشر كضت حاجتك باب الحاجه انا
اكضيهه واسعدك .. ماخاب اليكصدك
ياموسى ابن جعفر .. ياموسى ابن جعفر

هذا انت البقيت بكل زمن گبرك حضاره
رابح كلمن ايحبك وحب غيرك خساره
وبغداد بكبرهه اتامن بفي المناره
يبن الصادق وگبتك دليلا للحياره
چا وينه اليضدك .. ماخاب اليكصدك
ياموسى ابن جعفر .. ياموسى ابن جعفر

شاهد گبتك ياسيدي اعلى الشيعه شاهد
وعاهدناك ننطي ارواح ما ننطي المراقد
ياثورة رجب وزيارتك تنقل مشاهد
من عندك تعلمنه الصبر وانضل نجاهد
وفايه احنه ولدك .. ماخاب اليكصدك
ياموسى ابن جعفر .. ياموسى ابن جعفر

للخايف امان ومرقدك للتاه ديرة
الحاير يوصل لحد بابك وتنسي الحيره
والمهظوم من ينخاك تمطر فوكه غيره
شكرا الك انت الجاه والعز والعشيرة
كتلي اولا اردك .. ماخاب اليكصدك
ياموسى ابن جعفر .. ياموسى ابن جعفر

من سجنك لحد نعشك عشت رحلة مصايب
وحشه اجنازتك لا اهل يمهه ولا كرايب
نزلت من سمه الله واجت شيعتها الكواكب
وربك عوضك وانترست الدنيا مواكب
خدام وتودك ..ماخاب اليكصدك
ياموسى ابن جعفر .. ياموسى ابن جعفر

يمشيع نعش جد الجواد ابچي لغيابه
هذا التوكف املاك السمه اضيوف اعلى بابه
سجين وحتى حيطان السجن جانت تهابه
گبلك ياشمس تكدر تغيبهه السحابه
جاوبني ارد انشدك .. ماخاب اليكصدك
ياموسى ابن جعفر .. ياموسى ابن جعفر

مثلك ماكو بالدنيا وابد ماشفنه منك
مسجون وتحرر جم عقل من فكر سجنك
امقيد بس يلوح السمه الرايد يحچي عنك
ماتحزن الحالك جان لاجل حسين حزنك
تبچي لنحر جدك .. ماخاب اليكصدك
ياموسى ابن جعفر .. ياموسى ابن جعفر

 

للشاعر: صباح العتابي