قرآن الصبر (مكتوبة) - باسم الكربلائي

 

 

هالليله قُرآن الصبُر        نقراله قرآن
والكعبه حزنت وَي حِزِن  كعبة الاحزان

هالليله للرايد يحِج   خَل يلبس أحرام
ويطوف بدموع الحزن  يم كعبة الشام
هالليله نَعْش أم الصَبُر  حاضنته الايتام
إو رافعته أملاك السِمه   وجبريل دَفّان

هالليله نسمع بالعرِش   ترتيل آيات
ناصب عزه الزينب طلع  رب السموات
نعمه يگولون البشر    نسيان الأموات
او مذمومه يم زينب صفت  نعمة النسيان

حاشاهه ماحَلّت شَعَر   بِت داحي الباب
إولا مِشَت بأرض المعركه  إولا ذَبّت إحجاب
زينب مره إبهيئة علي  هيچ إحسب إحساب
شالت شجاعة حيدره  إوعِفّة النسوان

كل الجنان استبشرت  بالمقدَم الجاي
دخلت وصاح المصطفى  جيبوهه ويّاي
قدّم الماي اونادته    ماشرب الماي 
خبّرني بحسينك شرب   لو بعده عطشان

صاح العلي يابوالحسن  ودّيها لحسين
وخل تشبع بريحة عطر  صاحب الچفّين
وصلتهُم وركضت ركض  تِشتَم بالإثنين
إو ذرعانه عنده العافته   من غير ذِرعان

من لاگت أمها فاطِمه  وخاطرهه مجبور
نورين واتلاگن سوه   نور وحِضَن نور
وإبتدت تحچي عالسبي  والجره ابعاشور
وشلون راحت عالهِزِل   بسياط سُفيان

عالكوثر إلتَم الشمِل  مرتاحه الانفاس
وإبتدت تحچي ماجره  إبديوان الارجاس
شاط إو زعل لمّن سِمع   بالقصه عباس
بيدي لعذبهم حِلف   زمرة الشيطان

 

للشاعر : ناظم الحاشي