صوت أحبابك (مكتوبة) - باسم الكربلائي

 

 

صُوت أحبابَك إبكِل يُوم يِنعاد
يا يُــوم الـفَـرَجْ يا لِـيثْ بغداد

علِيـك إگلوبنه يُـومِـيـه مِحتـرگَه
يالكاظم صعب نتحَمَل الـفَــرگَـه
والمِثلَك يِضَيِــع يا ترى إشيِلگَـه
يِروِيـلك دَمِعنا أَفعالْ الاحقاد
يا يُــوم الـفَـرَجْ يا لِـيثْ بغداد

يا نَـسَـمه هَوَه للمختنِگ وَضعه
بعدك عالروافض ضاگت الوسعه
مِـن طـامُـورِتَـك نِتأمَـل الـرَجـعَه
كل يوم الحزِن بالشِيعه يِزداد
يا يُــوم الـفَـرَجْ يا لِـيثْ بغداد

نِشكِيلك وضعنه إو كِثرَتْ إعدانه
يالغايِب علـيـنَـه  إنريــدك اويانـه
بـعدك ياهو النه إو يــاهُـو يِرعانـه
ماعاد الصَبر سَلوَتنا ماعاد
يا يُوم الفَـرَجْ يا لِـيثْ بغداد

ما ضَل كِل صَبِر ياراهب العِترَه
يِـرتاح الضَــلام إبغِيبَتْ الگَـمرَه
كل شيعي إبغيابك منكسِر ظَهره
نِـتْـرَقَبْ قِدومك يابو الأَمجاد
يا يُــوم الـفَـرَجْ يا لِـيثْ بغداد

گالوا بالسجن ذَبلان كِل حِيِلَك
ماتِـعـرِفْ تَمَيـزْ إنهارك إو لِيلَك
تِبچي من الأسر و الأسر يبچِيلَك
عن وحشةّ هَلَكْ مو وحشَةّ الزاد
يا يُــوم الـفَـرَجْ يا لِـيثْ بغداد

إجانه إبن سُوَيْـدّ إو گال موعدنَه
بالجُمعه الجِسِـر بغداد نِـتـعَنَـه
شِفناها الجنازه إو ريِـتْ ما شِفنَه
موقف بين دَمعه إو بِينْ جَلاد
يا يُــوم الـفَـرَجْ يا لِـيثْ بغداد

مِن شِفنه الجنازه إوداعةّ إعيونك
إبوضِعنَـه إتحَيِـروا حتى اليِعادونك
سلاماً سيـدي عالعِيشَه من دونَـك
مانِنسَه الجَرِح يابـاب الإمْراد
يا يُـوم الـفَـرَجْ يا لِـيثْ بغداد

 

للشاعر: سجاد علاء المحمداوي