يا زينب - فيديو (مكتوبة) - باسم الكربلائي

 

 

يا زينب يا زينب يا زينب

من يا جرح بيج ابتدي كل عمرج اجروح او حزن
طفله او وعيتي اعله الكسر والسطره باسماعج ترن
من شفتي فاطم عالأرض طاحت مثل طيحة غصن
يا زينب يا زينب يا زينب

ثاني محطات الجرح والعادت امرار الهجر
بالكوفه حيدر من طلع لاكن رجعلج منطبر
ما ينجرع كاس اليتم يا زينب او رايد صبر
يا زينب يا زينب يا زينب

مر الزمن بيج او إجه دور الحسن بالسم كضه
بس الأشد بالطف لمن ضاكت عله احسين الفضه
تحت الحوافر يا وسف واضلوعه كلها امرضرضه
يا زينب يا زينب يا زينب 

بالطف نعاين يا جرح ياهو الأشد بيهن ألم 
من طاح ابو فاضل واجه ابعينه استقر ذاك السهم 
لو نحجي عن ذاك العمد او من عنده راسه اللي انهشم
يا زينب يا زينب يا زينب

أصعب جرح درب السبي يا زينب او ما ينحمل
لا بارك الله ابهالدهر تاليها مجتوفه ابحبل 
امن الكوفه حد شام الغدر مسبيه وسفه اعله الهزل
يا زينب يا زينب يا زينب

آخر محطات الألم راس الأخو جاج ابطشت
بالخيزران امن انضرب ناديتي كون آنه المتت 
او لا شفت اخويه ابهالوضع بديوان اميه من فتت
يا زينب يا زينب يا زينب 

 

للشاعر : مهيمن الفاطمي