لا تسألوني اعله حالي (مكتوبة) - باسم الكربلائي

لا تسألوني عله حالي 
رايح من عيوني غالي

انا الزهره ومصاب الدنيه شفته
وعلى وسادة محمد عمري عفته
تره وداع الفرح توني عرفته
وشعور الوالدة الثكلى افتهمته
وعذاب الفارقت والدها عشته
ابويه واني امه واني اخته
بالنعش شالوا دلالي
لا تسألوني عله حالي

شسولف يا زماني وشرد اعاتب
زغيرة اجتافي وكبار النوايب
احس دشّاب راسه من المصايب 
انه من الظيم شعري وقلبي شايب
جبتها وداع دنيه بلا حبايب
ظلام بلا ضوه ونور الله غايب
والدمع يشرح سؤالي
لا تسألوني عله حالي

ابوي اخر نبي بالدنيه كلها
غياب اول جرح روحي قتلها
اشما دنيا الحزن يثقل حملها
على جفوفه الحنينة يخف ثقلها
اذا تندار و اتشابك غزلها
يصفيها بوسع صدره ويحلها
ابچي والعالم بچالي 
لا تسألوني عله حالي

انا بنيتك يالوداعك هظمها
يا بويه وحسرة الشوك يضمها
انا لبعدك الف شامت ظلمها
وابشرك من فدك رايح سهمها
الجروح وداعتك يسهل ألمها
لكن كلمة يتيمة شقد عظمها
هذا ما كان على بالي
لا تسألوني عله حالي

اودعك بويه وانا بروحي جمره
لهجوم الدار بعدك بيه حسره
الضلع لو انت عايش من يكسره 
منو ليوصل لحد بابي ويعبره
ومنو يشيل ايده والمحسن يعصره
نعم حاضر علي ولو بيده امره
يا بشر يوصل خيالي
لا تسألوني عله حالي

انا بنت النبي وام الامامه
انا اول مراه لبست عمامه
لمن چان الوحي يسلم سلامه
انا بظهره چنت واسمع كلامه
شفت فقد الابو مثل القيامه
تعيش بلا جنح صعبة الحمامه
صعبه من دونه الليالي
لا تسألوني عله حالي

انا الزهره العظيمة ومن صفاتي
رضاة الله وملائكته برضاتي
قبل ما ارفع چفوفي بصلاتي
لأريده يصير وتصير امنياتي
ولكن والدي وشمعة حياتي
رحل والنوح صار اكبر سماتي
بعده يا دنيه شبقالي
لا تسألوني عله حالي

 

للشاعر :احمد الذهبي