بعدليل (مكتوبة) - باسم الكربلائي

بعد ليل سهرها و صبرها قدرها ناعي الاحباب
على حسين بجاها بوفاها و جزاها يوم الحساب
تگول الغانمة .. شفاعة فاطمة

بيتها الخالي من احبابه صفه
بي گمر عالي و على غفلة طفه
جم جرح ينزف و لا صحله شفه
وافت و عدها يقين و معرفة
تدري ام الحسن بنت المصطفى
من كرمها بالوفه تجازي الوفه
حلم طول عمرها و نذرها و ثمرها الاربع نجوم
على الباب احلها وصلها و املها تدوع الهموم
تريد الخاتمة .. شفاعة فاطمة

قدوة هاي ام البنين الكل مرة
اتبيع دنيتها ابنجاة الاخره
حلمت و يوم الوعد تتنطره
تخدم ابيت المجد و المفخره
امر هذا امن الجليل امقدره
كربله غاية حلمها اتفسره
يوافون ولدها ابوعدها و عهدها و العهد دين
يسرون گلبها ابعتبها و طلبها خدمة حسين
تصيح المكرمة .. شفاعة فاطمة

خبر عن جيت الضعن من سمعته
تركض ابلايه شعور اتلگته
كل املها حسين رادت شوفته
لمن اعله اولادها ما نشدته
اتحير و گامت تناشد دمعته
تموت لو يشرح مصيبة ذبحته
دمه ايسيل دمعها و صدعها و فجعها براعي الاحساس
حنه البين ظهرها و كسرها ابگمرها العالي عباس
ابصبرها امحزمه .. شفاعة فاطمة

وين زينب گلي يا ناعي الضعن
ايساعد الله ام المصايب و المحن
من طفولتها و قسه اوياها الزمن
اشلون عگب حسين ردت للوطن
و المصيبة اثنينهن من التگن
بجن الدنيه ابنعيهن من بجن
يجمرة حنيني اخبريني بنيني بيهم اقصور
ضحايه انذرتهم ردتهم لأختهم مأمن و سور
و اجر سيل الدمه .. شفاعة فاطمة

تگلها يا زينب جنت عندي امل
حسين اشوفه و خل يوافيني الاجل
وي رحيله عمري حسيته ارتحل
ودعت روحي امن هد ذاك المحل
عافني ابين الرجه و بين الوجل
و گلبي عن غيره و لا يوم السأل
واصيح اشبگالي يغالي سؤالي بلجن اتعود
يروحي الزجيه شبيديه و عليّه جروحك اشهود
ابفضل رب السمه .. شفاعة فاطمة

اني تالي العمر جانت منيتي
حسين يحضرني و يشيل اجنازتي
و ينزل الگبري و ينور وحشتي
و التراب ايهله ساعة دفنتي
اني بدياري و احس ابغربتي
حسين بيتي و موطني و كل دنيتي
الگلب راد قراره ابجواره ابمزاره مرقدي يكون
اشم طيب عطوره و ادوره و ازوره اويه اليزورون
نبع بعد الضمه .. شفاعة فاطمة

للعراق انشد الناوين ابسفر
لمّن يزورون مگطوع النحر
خلي يگلوله وصل ليك الخبر
اشرف اعله ام البنين امر القدر
انجان يوم رايد يوم تشييع ايحضر
خل يجيب اوياه عباس الگمر
على حسين حنيني ونيني و يجيني و يفگد الحال
انه يهون مصابي و عتابي و عذابي و همي ينزال
رحيلي اتشيمه .. شفاعة فاطمة

 

للشاعر : سيد سعيد الصافي الرميثي