شاعر حسيني (مكتوبة) - باسم الكربلائي

 

 

شاعر حسيني عايش ابالي
كاتب قصيده شيبت حالي
يا (أهلَ يَثربْ) ذبحو الغالي

اسمعت طارش الك طب المدينه
ركضت وگلبي سابگني بونينه
اَنه وبشر بمدامعنه التقينه
گبل لا يحچي گتله حسين وينه
منك يناعي رايده ابشاره
يوسف حياتي گلي شخباره
اِحچي شعلامك ساكت اگبالي

سأل عني وعرف إسمي مِنِ الناس
عله العباس ظل يقرالي بحساس
يگلي گطعوها چفوف عباس
يحره وبالعمود اتهشم الراس
بعين ابو فاضل طاحت النبله
لمن سمعته گتله اعد مُله
عباسي فدوه لشوفة الوالي

صحت إسمع سؤالي يا بشر زين
تره ما ناشدت عن الگمر وين
عليك الزهره گلي وين الحسين
مضه فوگ الشهر ما شافته العين
وهنا بدالي يقره بالمقتل
بين الشريعه والخيم والتل
طحت اعله وجهي وهو يقرالي

شعر يقره واشوف حروفه حمره
يگلي من الگفه مگطوع نحره
يحره و خيلهم ترفس بصدره
بحصيره يجمعونه وذره وذره
صدره الزچيه اتشمه وتبوسه
ليش الحوافر ظلت اتدوسه
لزينب مشيت وأجر بذيالي

صحت زينب هله يالهاشميه
بچت واتگلي سميني السبيه
شمر بسياطه شوفي اشسوه بيه
الحبل احمر ييُمه بدم اديه
بهونچ ييُمه من تشبگيني
من سوط اميه متني ياذيني
أصعب مصيبه شافو خيالي

بچيت اعليك حد ما طلعت الروح
لقانه بالگبر واحچيلك اجروح
دخيلك لا تجيني وانت مذبوح
بعد ما بيها مهجه ارويحتي اتنوح
اشتاگ اشوفك وآشم بنفاسك
خوفي تجيني منگطع راسك
ليوم القيامه نوحي يبرالي

 

للشاعر : كرار حسين الكربلائي