إجانه الصبح (مكتوبة) - باسم الكربلائي

يركض اجانه الصبح
مستعجل اعله الذبح
واليدخل الكربله
مايطلع ابلا جرح

ليش ليش .. مستعجل وتركض شلك علينه
روح روح .. لو عندك امروه فلا تجينه
گول گول .. تفرح إذا شفت الحبل بدينه
عاد عاد .. اتأخر اشويه تره انولينه

رد ياصباح الدمع
صوت الشمر ينسمع

واليعرف المسأله ** مايطلع ابلا جرح

هاي هاي .. سبعين تتهيئ لـ ألـمنه
وين وين .. وين انطي وجهي من بعد زلمنه
نار نار .. تدري بصباحك تحترگ خيمنه
خاف خاف .. عالمشرعه باچر يگع علمنه

ذاكه السهم مو سهل
يگـطع وريد الطفل

والينظر الحرمله ** مايرجع ابلا جرح

صار صار .. واضح غدا بت فاطمه وحيده
ويل ويل .. موته الهواشم والنجف بعيده
ماي ماي .. يعطش اهوي وينظر لعضيده
موت موت .. ياهو الاشوفه انظر الورديده

مو بس خيم تحترگ
باجر نبي ينسحگ

واليبقه بالعايله ** مايطلع ابلا جرح

ذاك ذاك .. وجه الشمر لاتعتقد اضيعه
حيف حيف .. يرفس اخويه وعالارض يوگعه
آه آه .. راس الحبيب من الگفه يـگطعه
عين عين .. عينه عليه وعالرمح يرفعه

باچر يطيح المتن
قبله يطيح الجفن

واليمشي وي قاتله ** مايطلع ابلا جرح

ليل ليل .. من هسه دخان الخيم اشمه
خيل خيل .. ها يا رقيه تصعب المهمه
هنا هنا .. باجر اذانچ تنگطع يعمه
ويل ويل .. ياهو الأضيعه وياطفل ألزمه

باچر رماد الخيم
يصبغ وجوه الحرم

والعايش المُعضله ** مايطلع ابلا جرح

هاك هاك .. إبن امي إحسب والاصابع عشره
شوف شوف .. لكن على الخنصر يطيل النظره
عود عود .. منهو اليسلب خاتمه ويبتره
ليش ليش .. يحسب ضلوعه ويمسح اعله صدره

عشرة خيول الظهر
حتماً ترض الصدر

لو شافه عقد الوله ** مايطلع ابلا جرح

راح راح .. من الرمل سوه وساده شفته
نام نام .. واتمدد اعليها ولزم رگـبته
ذاك ذاك .. مكانه ويعرف ابذبحته
آه آه .. اني ابخيامي وسمعت حسرته

گام وگصد للنهر
من يمشي محني الظهر

والمحني من أوله ** مايطلع ابلا جرح

هام هام .. ها يا صبح خو وضحت الحكايه
صار صار .. افگذ اخوتي والشمر ورايه
جيش جيش .. ينظرلي ورماد الخيم غطايه
صيح صيح .. باچر بنات المرتضى سبايه

باچر ركوب الهزل
ياكل بأيديه الحبل

واليمشي بالقافله ** مايطلع ابلا جرح

 

 

للشاعر: السيد عبدالخالق المحنة