ما اسأل بعد (مكتوبة) - باسم الكربلائي
منذ ٩ أشهر١١٦مشاهده
لطمية ما اسأل بعد مكتوبة
الرادود باسم الكربلائي
ما أسْأل بعَد عنّ الگبر وين
طِلَع گبر الزچيّه ابگلب الِحْسين
لذلك صرت ازورن گبره مَرْتين
بعد ماگول ادوّر وين عن گبر الزچيّه
شفت عِدْها گبُر موجود برْض الغاضريّه
خلّو تسحگ اِعله حسين خيل الأعوجيّه
درو بي دافن ابگلبه ليالي الفاطِميّه
واگول ابكربله واِحْساسي موجوع
سلام الله عله مكسوره الِضْلوع
وابوكت الزِّياره ابروحي حزنين
لذلك صرت ازور حسين مَرْتين
صرِت كلما أشُوفن باب أريدن ضِلْعي اَكِسْره
اومن يحچولي عالبِسْمار أحِس ابصدري حَسْره
مدري اشْيِنْلِچم بالرُّوح يم كل طاري عَصْره
واريد اِسْنيني من عاشُور لَحَد مجلس الزّهْره
مِنّ ابچي ابليالي الفاطميّات
أگول احسين اظنّه ابهالشّهر مات
روح اويه امّه ماظن هُمّه روحين
لذلك صرت ازور حسين مَرْتين
هيّه الزهره بالإحساس صارلها مدينه
التون كل مجلس امْن ايصير لحْسين اوونينه
أحسها اتگول آ يحسين وادري الأم حنينه
واقره نُوحي عالأولاد يا زهره الحزينه
أحَسْها اتگول لو وكْت العَزَه حان
آنه الوالده والگلب لهفان
دمعي اولطمي صار الفاطِمه دين
لذلك صرت ازور حسين مَرْتين
لگيت ابعُمري عاشورين مجالسهن ثجيله
مُحرّم واللّيالي هاي عشتهن ليله ليله
اتلاثه الفاطمه ابكل عام روايات اوقليله
اوغير احسين وامّ احسين ما عندي وسيله
وآنه ابّابهم ماعوف هالباب
وِقاري بالجزَع والحزِن جِلْباب
اومثِل هذا الشَّرَف يتحصَّل امْنين
لذلك صرت ازور حسين مَرْتين
عشِت كل عمري اشوف احسين يشكر باليخِدْمه
واليبچي ابعزه الزَّهْراء هوّه ايْكرمه نسمه
ابْعين الله چبير ايصير مِنّ ايْسجّل اِسْمه
اشْمحلاها إذا يرضون عنّي هوّه وامّه
وآنه اِحسين ابويه اوعاشگه اِهْواي
وابكل المواقِف واگف اوْياي
مثْل الدّمعه ابد ما فارگ العين
لذلك صرت ازور حسين مَرْتين
گمِت كلما أزُور احْسين واسَلِّم روحي بيده
أحس ابفاطِمه اتنَشِّف بعدها ابدم وريده
واگض شبّاچه واتمنّه اوتگلي اخذ التريده
واحس الزّهْره تقره اوياي منّ اقره قصيده
اومو بالكيف دمعي ايطيح واحْتار
أشوف الفاطمه باِحْساسي تذكار
النفَس يخنگني وايأذّنّي ضِلْعين
لذلك صرت ازور حسين مَرْتين
بلا شكّ هاِلمجالس هاي حضور الزّهْره بيها
تجي واتْشُوف ياهو الجاي منو اليبچي عليها
عمت عيني عله الضِّلعين تمشي امخلْيَه اديها
لو بيدي تظل ترتاح وآنه ابدمعي اجيها
رايح حيلها مِن عصْرَة اِلباب
تره ما عايزه تتچمّل اِصْواب
لو يندار درْت الصابها البين
لذلك صرت ازور حسين مَرْتين
ابْمجالس فاطِمه اتربّيت واموتن بيها رايد
وايْشيعوني الِيْخدمون والزّهْره تشاهِد
وينلفّ الچفن يا ريت أوراق القصايد
اولطميّه الدُّعاء ايْصير لو يدعيلي واحِد
احسين ايْگلّي راح امّي اتَّلَگاك
باب الجنّه باب امّ الحَسَن ذاك
اوعله خدمتها رايد أمضي عُمرين
لذلك صرت ازور حسين مَرْتين
للشاعر : محمد العقّابي
التعلیقات