مو يمنه هسه - فيديو (مكتوبة) - باسم الكربلائي

مو يَمْنَه هَسّه وأَمس ويّانه ويّانه
يُمّه بغيابچ وحشه دنيانه دنيانه

چانت أمس محلاهه جَمْعَتنه
والبيت يضوي وإنتي شمعتنه
ياهو الينشّف بعد دمعتنه
خَط اليتم يالزهره عنوانه

نبع الحنان وگلبچ الصافي
بينه إشتياق الحضنچ الدافي
ما كافي من هالفرگه ما كافي
كل گلب بينه زادت أحزانه

شيفيد باچر لو يجي باچر
بهذا السفر ما يرجع إمسافر
وبوجه أبونه كَسْرَت الخاطر
كَسْرت الطير الفگد جنحانه

مفجوع أبونه حيدر الوالي
والغالي يرخص عمره للغالي
معقوله مَتْرجعين للتالي
حتى الطيور اعليچ حزنانه

ناح الحمام وما خلص نوحه
والدنيه كلهه إعليچ مجروحه
بسيف الحزن فرحتنه مذبوحه
بس الدمع مفتوحه بيبانه

يا يُمّه توجَع كلمة الذكرى
هاي العباره بيهه ألف حسره
اللّه اليرحمچ يُمّه يالزهره
جمر الحزن ما تطفه نيرانه

يلّي بشبابچ خلصت اسنينچ
وينچ تعالي هالمسه وينچ
اتباوع علينه من غُفت عينچ
والنوب أبونه ضَمْنَه بآحضانه

 

للشاعر : عمار هليل الواسطي