حده حادي الضعينه (مكتوبة) - باسم الكربلائي

حده حادي الضعينه ابطور فرگاكم
صحت الله ومحمدنه وعلي اوياكم

إذكروها ... لتنسوها ... عليلتكُم

دعواي رجواي .. ربي بارك وسهل أمرهُم
يا نور بالنور .. إقبل دعوتي وحقق نصرهُم
ماشين والدين .. بانت ميلته ويطلب عمرهُم
تشييع توديع .. ماتفرق على اعيوني ابسفرهُم

صحت حي النشامه اوحي بني هاشم
ابويه اويا عمامي اويا علي وجاسم

تشافيني .. تعافيني .. شهامتكُم

معروف شيشوف .. من ودع هله وسلم للغياب
مرعوب ويلوب .. يركض عالهوه لو حرك الباب
واليوم معلوم .. انه اوداري انعـه ابفگد الاحباب
والدار اخطار .. يفرشني الظلام وصفنتي أنياب

عله باب الجرح أكتب اساميكم
وانه كل يوم أصبحكم وأمسيكم

تودعكُم .. تشجعكُم .. حبيبتكُم

ياابطال يارجال .. حيهم دينكم ماتت رجاله
شبان قربان .. طيحوا والمُهم تبقه الرساله
مطلوب مكتوب .. تروي كربله ادموع الثكله
بخيام جسام .. يشعل شمعته ابـلحظة نزاله

هلي شيب اوشباب ابساعة الكلفه
يشيمون ابفعلهم والحرب زفه

مثل حيدر .. عله خيبر .. يـصولتكُم

عباس عباس .. اتمنه اشوفك من تقاتل
وياك حياك .. بيدي معصبي اودمعي هلاهل
مغوار كرار .. تگلبها عليهم يابو فاضل
المريود مو جود .. جيب المشرعه وذل الجحافل

أعرفك ماتگول اچفوفي مگطوعه
تگول الحمد لله الرايه مرفوعه

ينعمَ العم .. تريد الدم .. رسالتكُم

ياروح وتروح .. عبدالله رحت يابعد أخيتـك
تفكير ويصير .. عالشط تنذبح ضامي عرفتك
عطشان حزنان .. عمك محسن اليمسح دمعتك
وارجاك وانخاك .. لو جاك السهم طلع رگبتك

اخوي الـ بالمهد بس يفزع اوياهُم
اذا هجموا عمامه ايصيح حياهُم

يناغيهُم .. يناديهُم .. سلامتكُم

وشلون يأُم عون .. عمه اهوايه انتي مو قليله
بكتاب وحساب .. من بعد الگمر انتي الكفيله
بحبال وعيال .. انتي اعليـچ الايام الثگيله
حبيت ياريت .. خطي اعله النهر اسم العليله

مثل عباس اعرفچ غيره ومروه
ازرعي عالشريعه چلمة الخوه

يبو فاضل .. تره اتقاتل .. عقيلتكُم

سلواي يضواي .. رايدني اظل واني اريدك
موجوع بدموع .. تكسر ظهرك ابطيحة عضيدك
مظلوم مهموم .. تنصر ربك ابگطعة وريدك
افعال تنگال .. چي ماصافحتهم گطعوا ايدك

أريدك والشمر گاعد على صدرك
تذكر حسرتي ما بستك ابنحرك

ولا نظره .. بقت حسره .. يشوفتكُم

صولات حملات .. سكنه وعاتكه وخوله ورقيه
محبوب مهيوب .. صوت اللهُ اكبر من سبيه
دعوات دمعات .. كل دمعه ابسهم بعروش اميه
آلام وايتام .. لكن تبني دولة حيدريه

ولا انكر اموت اودمعتي ابخدي
يظل ثار السبايه ابطلعة المهدي

يواسيها .. يشافيها .. رقيتكُم